नवराज्य Live न्यूज नेटवर्क
जळगाव : डिजिटल बँकिंगच्या दिशेने महत्त्वाचे पाऊल टाकत जळगाव जनता सहकारी बँक लि., जळगाव यांच्या ‘नेट बँकिंग’ सेवेचा शुभारंभ मंगळवारी सायंकाळी मुख्य कार्यालयात उत्साहपूर्ण वातावरणात संपन्न झाला. ग्राहकांना आधुनिक, जलद आणि सुरक्षित सेवा उपलब्ध करून देण्याच्या उद्देशाने हा उपक्रम सुरू करण्यात आला आहे.
कार्यक्रमाला स्पेक्ट्रम इलेक्ट्रिकल इंडस्ट्रीज लिमिटेडचे अध्यक्ष व व्यवस्थापकीय संचालक श्री. दीपक चौधरी आणि जळगाव जनता इन्फोटेक कंपनीचे श्री. कांतीलाल बडाले प्रमुख पाहुणे म्हणून उपस्थित होते. कार्यक्रमाच्या अध्यक्षस्थानी बँकेचे अध्यक्ष श्री. सतीश मदाने होते.
सोहळ्याची सुरुवात मान्यवरांच्या हस्ते दीपप्रज्वलनाने करण्यात आली. प्रास्ताविकात संचालक श्री. नितीन झंवर यांनी बँकेच्या प्रगतीचा आढावा घेत डिजिटल सेवांचा विस्तार ही काळाची गरज असल्याचे सांगितले. ग्राहकांनी नव्याने सुरू करण्यात आलेल्या नेट बँकिंग सेवेचा अधिकाधिक लाभ घ्यावा, असे आवाहन त्यांनी केले.
उपमहाव्यवस्थापक श्री. राजेश महाजन यांनी नेट बँकिंग सेवेची सविस्तर माहिती देत ग्राहकांना मिळणाऱ्या सुविधांबाबत मार्गदर्शन केले. यानंतर प्रमुख पाहुणे श्री. दीपक चौधरी यांच्या हस्ते नेट बँकिंग सेवेचे औपचारिक उद्घाटन करण्यात आले.
आपल्या मनोगतात श्री. दीपक चौधरी यांनी डिजिटल व्यवहारांची सवय ही काळाची गरज असल्याचे नमूद करत, जळगाव जनता सहकारी बँकेने ग्राहकांसाठी सुरू केलेली ही सेवा अत्यंत उपयुक्त ठरणार असल्याचे सांगितले. आधुनिक तंत्रज्ञानाचा वापर करून ग्राहकांनी सुरक्षित आणि जलद व्यवहार करावेत, असेही त्यांनी यावेळी म्हटले.
अध्यक्षीय भाषणात श्री. सतीश मदाने यांनी ग्राहक केंद्रीत सेवा देण्याच्या बँकेच्या धोरणाचा पुनरुच्चार करत, भविष्यातही ग्राहकांसाठी अधिक नाविन्यपूर्ण सुविधा उपलब्ध करून देण्याचा संकल्प व्यक्त केला.
कार्यक्रमात उपस्थित ग्राहकांनीही नव्या नेट बँकिंग सेवेबद्दल समाधान व्यक्त करत बँकेच्या या पुढाकाराचे स्वागत केले. कार्यक्रमाचे सूत्रसंचालन सौ. निलम जोशी यांनी केले, तर मुख्य कार्यकारी अधिकारी श्री. संजय नागमोती यांनी आभार मानले.
यावेळी संचालक मंडळाचे सदस्य, अधिकारी, कर्मचारी तसेच बँकेचे ग्राहक मोठ्या संख्येने उपस्थित होते.
