नवराज्य Live न्यूज नेटवर्क
जळगाव : नशिराबाद परिसरातील एका प्रकरणाची चौकशी बंद करण्याच्या मोबदल्यात ५० हजार रुपयांची लाच स्वीकारल्याप्रकरणी महसूल विभागातील मंडळ अधिकारी आणि एका खासगी इसमाविरुद्ध गुन्हा दाखल करण्यात आला आहे. नाशिक लाचलुचपत प्रतिबंधक विभागाने (एसीबी) सापळा रचून ही कारवाई केली असून, खासगी इसमाला रंगेहाथ पकडण्यात आले आहे. या घटनेमुळे महसूल विभागात मोठी खळबळ उडाली आहे. मिळालेल्या माहितीनुसार, तक्रारदाराविरोधात अवैध खोदकामासंदर्भात विविध शासकीय कार्यालयांकडे तक्रारी करण्यात आल्या होत्या. या तक्रारींची चौकशी थांबवण्यासाठी मंडळ अधिकारी मिलींद देवरे यांनी सुरुवातीला एक लाख रुपयांची मागणी केल्याचा आरोप आहे. नंतर तडजोडीनंतर ५० हजार रुपये स्वीकारण्याचे निश्चित करण्यात आले.
तक्रारदाराने याबाबत नाशिक एसीबीकडे धाव घेतल्यानंतर अधिकाऱ्यांनी पडताळणी केली. त्यामध्ये लाचेची रक्कम खासगी इसम सुरेंद्र प्रल्हाद अहिरे याच्याकडे देण्यास सांगण्यात आल्याचे स्पष्ट झाले.
यानंतर एसीबीच्या पथकाने पिंप्राळा तलाठी कार्यालय परिसरात सापळा रचला. ठरल्याप्रमाणे तक्रारदाराने सुरेंद्र अहिरे याला ५० हजार रुपये दिल्यानंतर पथकाने त्याला तत्काळ ताब्यात घेतले. या प्रकरणी मंडळ अधिकारी मिलींद देवरे आणि सुरेंद्र अहिरे यांच्याविरुद्ध रामानंद नगर पोलिस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.
ही कारवाई नाशिक एसीबीच्या अधिकाऱ्यांच्या मार्गदर्शनाखाली करण्यात आली असून, पुढील तपास एसीबीकडून सुरू आहे.
