नवराज्य Live न्यूज नेटवर्क
शहरातील वाहतूक कोंडी कमी करण्यासाठी वाहतूक शाखेकडून नो पार्किंगमध्ये उभ्या करण्यात आलेल्या वाहनांवर कठोर कारवाई सुरू करण्यात आली आहे. गुरुवारी गोलाणी मार्केट परिसरात नो पार्किंगमध्ये उभ्या असलेल्या दुचाकी व चारचाकी वाहनांवर वाहतूक पोलिसांनी दंडात्मक कारवाई केली.
विशेष म्हणजे, ही कारवाई अत्याधुनिक कॅमेऱ्यांच्या माध्यमातून करण्यात आली. नो पार्किंग क्षेत्रात उभ्या असलेल्या वाहनांचे फोटो आणि क्रमांक नोंदवून संबंधित वाहनधारकांवर ऑनलाईन दंड आकारण्यात आला. अचानक झालेल्या या कारवाईमुळे वाहनचालकांमध्ये एकच खळबळ उडाली.
गोलाणी मार्केट परिसरात दिवसभर मोठ्या प्रमाणावर वाहतूक कोंडी होत असल्याने नागरिकांकडून वारंवार तक्रारी करण्यात येत होत्या. त्यानुसार वाहतूक शाखेने ही मोहीम राबवली. नियमांचे उल्लंघन करणाऱ्या वाहनधारकांविरोधात पुढील काळातही अशीच कठोर कारवाई सुरू राहणार असल्याचा इशारा वाहतूक विभागाकडून देण्यात आला आहे.
वाहतूक नियमांचे पालन करून वाहन योग्य ठिकाणी पार्क करावे, असे आवाहनही पोलिस प्रशासनाकडून करण्यात आले आहे.
