नवराज्य Live न्यूज नेटवर्क
जळगाव : जळगावच्या कु. तेजल सचिन जगताप हिने अल्पवयातच उल्लेखनीय कामगिरी करत इंडिया बुक ऑफ रेकॉर्ड्समध्ये आपले नाव नोंदवले आहे. सध्या Kendriya Vidyalaya AFS Darjipura येथे इयत्ता सहावीत शिक्षण घेणाऱ्या तेजलने वयाच्या अवघ्या दहाव्या वर्षी सर्वाधिक वेळ न थांबता तबला वादन करण्याचा विक्रम प्रस्थापित केला आहे.
तेजलने तब्बल २ तास, १ मिनिट आणि ४० सेकंद अखंड तबला वादन करत हा अनोखा विक्रम केला. तिच्या या कामगिरीला India Book of Records यांनी २८ एप्रिल २०२६ रोजी अधिकृत मान्यता दिली.
हा विक्रम प्रस्थापित करण्यासाठी तेजलने दररोज ३ ते ४ तास तबल्याचा कठोर रियाज केला. सलग दोन तासांपेक्षा अधिक वेळ एकाच जागी बसून तिने ताल तिनतालमध्ये पेशकार, विविध कायदे, रेले, गत, चक्रधार, परन तसेच नामवंत उस्ताद आणि पंडितांच्या बंदिशी सादर केल्या. विशेष म्हणजे, संपूर्ण सादरीकरणादरम्यान तिने एकही रचना पुन्हा वाजवली नाही.
तेजलच्या या यशामागे तिची आई गुंजन जगताप व वडील सचिन जगताप यांचे मोलाचे मार्गदर्शन लाभले. सचिन जगताप हे तेजलचे आद्य गुरू देखील आहेत. याशिवाय गुरु श्री. स्वप्नील भिसे (मुंबई), श्री. राजीव भट्टाचार्जी आणि डॉ. दिपेश दोढी यांचेही तिला मार्गदर्शन लाभले.
तेजल ही जळगावातील जगताप टेलर्सचे शामकांत शिंपी यांची नात असून, तिच्या या यशामुळे जळगाव जिल्ह्याच्या शिरपेचात मानाचा तुरा रोवला गेला आहे. तिने केलेल्या या बुक ऑफ रेकॉर्ड बद्दल जळगाव शहराचे आमदार राजूमामा भोळे यांनी तिचे कौतुक करत तिच्या भविष्यातील वाटचालीसाठी शुभेच्छा दिल्या असून तिला सर्वतोपरी मदत करणार असल्याचे आमदार भोळे यांनी सांगितले. विविध स्तरांतून तेजलवर अभिनंदनाचा वर्षाव होत आहे.
