नवराज्य Live न्यूज नेटवर्क
एरंडोल तालुक्यातील कासोदा येथे कृषी विभाग आणि पोलिसांनी संयुक्त कारवाई करत बोगस HTBT कापूस बियाण्यांच्या रॅकेटचा पर्दाफाश केला. चारचाकी वाहनातून प्रतिबंधित बियाण्यांची वाहतूक सुरू असल्याची माहिती मिळाल्यानंतर टाकलेल्या धाडीत तब्बल ४ लाख ८० हजार रुपयांच्या बोगस कापूस बियाण्यांचा साठा जप्त करण्यात आला. वाहनासह एकूण लाखोंचा मुद्देमाल पोलिसांनी ताब्यात घेतला आहे.
कृषी विभागाला कासोदा परिसरात छुप्या पद्धतीने HTBT प्रतिबंधित कापूस बियाण्यांची विक्री आणि वाहतूक सुरू असल्याची गुप्त माहिती मिळाली होती. त्यानुसार ७ मे रोजी कृषी विभागाच्या पथकाने पोलिसांच्या मदतीने सापळा रचत संशयित वाहनाची तपासणी केली. यावेळी वाहनातून मोठ्या प्रमाणात अनधिकृत बियाण्यांचा साठा आढळून आला.
कारवाईदरम्यान ‘प्रीमियम रिसर्च हायब्रीड कॉटन सीड’, ‘श्री गणेशा +5G’ आणि ‘आकाश +5G’ नावाची प्रतिबंधित HTBT कापूस बियाण्यांची ४०० पाकिटे जप्त करण्यात आली. ही बियाणे आठ पोत्यांमध्ये भरून वाहतूक केली जात होती. जप्त बियाण्यांची किंमत सुमारे ४ लाख ८० हजार रुपये असल्याचे सांगण्यात आले.
याशिवाय बियाणे वाहतुकीसाठी वापरण्यात येत असलेली मारुती स्विफ्ट डिझायर कारही जप्त करण्यात आली. वाहनासह एकूण मुद्देमालाची किंमत अंदाजे १० लाख रुपयांहून अधिक असल्याची माहिती कृषी विभागाने दिली.
या प्रकरणी योगेश बळवंत पाटील (रा. सौंदाणे, जि. जळगाव) आणि नितीन देवरे (रा. वाडीभोकर, जि. धुळे) यांच्या विरोधात कासोदा पोलीस ठाण्यात गुन्हा दाखल करण्यात आला आहे. कृषी अधिकारी निखिल टोळकर यांच्या फिर्यादीवरून बियाणे कायदा १९६६, पर्यावरण संरक्षण अधिनियम १९८६, कापूस बियाणे अधिनियम २००९ तसेच अत्यावश्यक वस्तू अधिनियम १९५५ अंतर्गत कारवाई करण्यात आली आहे.
ही कारवाई जिल्हा गुणवत्ता नियंत्रण निरीक्षक विकास बोरसे, कृषी अधिकारी निखिल टोळकर, परेश बडगुजर, सचिन पाटील तसेच कासोदा पोलीस स्टेशनचे निरीक्षक श्रीकांत पाटील यांच्या पथकाने केली. वरिष्ठ कृषी अधिकाऱ्यांच्या मार्गदर्शनाखाली ही धडक मोहीम पार पडली.
