नवराज Live न्यूज नेटवर्क
जळगाव – खरीप हंगामाच्या पार्श्वभूमीवर शेतकऱ्यांना खतांचा सुरळीत पुरवठा व्हावा यासाठी प्रशासन सतर्क झाले असून जिल्हा परिषदेच्या मुख्य कार्यकारी अधिकारी करिश्मा नायर यांनी शुक्रवारी जळगाव तालुक्यात अचानक धडक तपासणी मोहीम राबवली. किनोद येथील भावना कृषी सेवा केंद्रात जाऊन त्यांनी खत विक्री व्यवस्थेची प्रत्यक्ष पडताळणी केली.
तपासणीदरम्यान करिश्मा नायर यांनी पॉस मशीनमधील विक्री नोंदी तपासल्या. तसेच खतांचे बिल बुक, साठा नोंदवही आणि खत परवान्यांची बारकाईने छाननी केली. शेतकऱ्यांना खत वितरणात कोणतीही हलगर्जीपणा किंवा अनियमितता सहन केली जाणार नसल्याचे त्यांनी स्पष्ट केले.
“खत वितरणात गैरप्रकार आढळल्यास संबंधितांवर कठोर कारवाई करण्यात येईल,” असा स्पष्ट इशारा त्यांनी यावेळी दिला.
यानंतर त्यांनी कानळदा रोडवरील गोल्डन ट्रान्सपोर्ट येथे साठवून ठेवण्यात आलेल्या सुमारे १५० टन युरिया खतांच्या बफर साठ्याचीही अचानक पाहणी केली. साठा उपलब्धता, वितरण प्रक्रिया आणि नोंदींची प्रत्यक्ष तपासणी करून संबंधित अधिकाऱ्यांना आवश्यक सूचना देण्यात आल्या.
या धडक तपासणी मोहिमेदरम्यान कृषी विकास अधिकारी पद्मनाभ म्हस्के तसेच कृषी अधिकारी धीरज बढे उपस्थित होते.
