नवराज्य Live न्यूज नेटवर्क
पावसाळा तोंडावर आलेला असताना शहरात नागरी सुविधांची दैना उडू नये, यासाठी जळगाव शहर महानगरपालिकेच्या महापौर दीपमाला काळे यांनी आक्रमक पवित्रा घेतला आहे. महापौरांनी त्यांच्या दालनात बांधकाम विभागाची तातडीची बैठक बोलावून पावसाळापूर्व कामांचा सविस्तर आढावा घेतला. यावेळी रस्त्यांवरील खड्डे बुजवण्यासह धोकादायक झाडे व फांद्या हटवण्याचे स्पष्ट आदेश प्रशासनाला देण्यात आले.
बैठकीत पावसाळ्यात नागरिकांना कोणतीही अडचण निर्माण होऊ नये, यासाठी विविध विभागांना तत्काळ कामे पूर्ण करण्याच्या सूचना देण्यात आल्या.
धोकादायक झाडे आणि फांद्यांवर कारवाई
पावसाळ्यात वादळी वाऱ्यामुळे झाडे कोसळून दुर्घटना होण्याची शक्यता लक्षात घेता, शहरातील रस्त्यांलगत असलेली धोकादायक झाडे, सुकलेल्या फांद्या तसेच विजेच्या तारांना स्पर्श करणाऱ्या फांद्या तातडीने हटवण्याचे आदेश महापौरांनी दिले. यामुळे संभाव्य अपघात टाळण्यास मदत होणार असल्याचे सांगण्यात आले.
रस्ते दुरुस्ती आणि खड्डेमुक्तीवर भर
शहरातील मुख्य तसेच अंतर्गत रस्त्यांवर पडलेले खड्डे बुजवून तातडीने डागडुजी करण्याच्या सूचना बांधकाम विभागाला देण्यात आल्या. पावसाळ्यात वाहनधारक आणि नागरिकांची गैरसोय होऊ नये, यासाठी ही कामे प्राधान्याने पूर्ण करण्याचे निर्देश देण्यात आले.
नगरसेवकांच्या प्रस्तावांना गती
विविध प्रभागांतील नगरसेवकांनी रस्ते, गटारी आणि इतर विकासकामांबाबत सादर केलेल्या प्रस्तावांवर विलंब न करता तातडीने अंदाजपत्रके तयार करण्याचे आदेश संबंधित अभियंत्यांना देण्यात आले. प्रलंबित कामांना गती देऊन नागरिकांच्या मूलभूत सुविधांमध्ये सुधारणा करण्यावर भर देण्यात आला.
बैठकीत नियोजित कामांचा आराखडा सादर करण्यात आला. यावेळी शहर अभियंता योगेश बोरोले, विद्युत विभाग प्रमुख संदीप मोरे, बांधकाम विभागातील कनिष्ठ व शाखा अभियंते तसेच संबंधित कर्मचारी उपस्थित होते.
महापालिकेने शहर विकास आणि पावसाळ्यातील आपत्ती निवारण या दोन्ही आघाड्यांवर आतापासूनच तयारी सुरू केल्याने नागरिकांना दिलासा मिळण्याची अपेक्षा व्यक्त केली जात आहे.
