नवराज्य Live न्यूज नेटवर्क
जळगाव : सोशल मीडियावर महिलांबाबत तसेच भारतीय जनता पक्षाविषयी अभद्र व बदनामीकारक टिप्पणी करणाऱ्या व्यक्तीवर कठोर कारवाई करण्याची मागणी करत भाजप महिला मोर्चाच्या वतीने जिल्हा पोलीस अधीक्षकांना निवेदन देण्यात आले.यावेळी महापौर दीपमाला काळे दीपक सूर्यवंशी नीता परदेशी,रेखा पाटील, उज्वला बेंडाळे, गायत्री राणे, विशाल त्रिपाठी, राहुल वाघ,राजेश सोनवणे, नगरसेवक रमेश मतानी, ग्रामीणचे संजय चौधरी, गिरीश वराडे, मनोज भांडारकर यांच्यासह अनेक कार्यकर्ते उपस्थित होते.
मिळालेल्या माहितीनुसार, दि. ४ मे रोजी भाजपा पक्षाने विविध राज्यांतील निवडणुकीतील यशानंतर जळगाव जिल्ह्यात जल्लोष कार्यक्रम आयोजित केला होता. यासंदर्भातील बातमी एका फेसबुक पेजवर प्रसिद्ध झाल्यानंतर संबंधित पोस्टवर एका व्यक्तीने अत्यंत अश्लील व आक्षेपार्ह टिप्पणी केली. या टिप्पणीत महिलांविषयी अपमानास्पद भाषा वापरून त्यांच्या चारित्र्यावरही टीका करण्यात आल्याचा आरोप करण्यात आला आहे.
भाजप महिला मोर्चाच्या पदाधिकाऱ्यांनी सांगितले की, अशा प्रकारच्या टिप्पणीमुळे केवळ पक्षाचीच नव्हे तर संपूर्ण महिला समाजाची बदनामी होत असून समाजात वैमनस्य निर्माण होण्याची शक्यता आहे. त्यामुळे माहिती तंत्रज्ञान कायदा तसेच भारतीय दंड संहितेनुसार संबंधित व्यक्तीवर तात्काळ गुन्हा दाखल करून कठोर कारवाई करावी, अशी मागणी करण्यात आली आहे.
तातडीने कारवाई न झाल्यास आंदोलन छेडण्याचा इशाराही देण्यात आला आहे.
