नवराज्य Live न्यूज नेटवर्क
देशातील न्यायप्रणालीमध्ये आमूलाग्र बदल घडवून आणणाऱ्या नवीन भारतीय न्याय संहिता (BNS) आणि जुन्या कायद्यांमधील फरक तसेच नव्या उपाययोजनांची माहिती देण्यासाठी जळगाव जिल्हा पोलीस दलाच्या वतीने रविवारी पोलीस अधीक्षक कार्यालयाच्या सभागृहात विशेष पत्रकार कार्यशाळेचे आयोजन करण्यात आले.
ही कार्यशाळा जिल्हा पोलीस अधीक्षक श्रीकांत ढिवरे यांच्या मार्गदर्शनाखाली पार पडली. यावेळी अप्पर पोलीस अधीक्षक संदीप गावित आणि पोलीस निरीक्षक ज्ञानेश्वर धारबडे यांनी उपस्थित माध्यम प्रतिनिधींना नवीन कायद्यांबाबत सविस्तर माहिती दिली.
ब्रिटीशकालीन कायद्यांऐवजी भारतीय संस्कृती आणि आधुनिक तंत्रज्ञानावर आधारित नवीन कायदे लागू करण्यात आले असून, यामुळे न्याय मिळण्याची प्रक्रिया अधिक वेगवान आणि पारदर्शक होणार असल्याचे यावेळी स्पष्ट करण्यात आले. तंत्रज्ञानाचा वापर, गुन्ह्यांचे नव्याने वर्गीकरण तसेच शिक्षेच्या तरतुदींमधील बदल यावर पोलीस प्रशासनाकडून सादरीकरण करण्यात आले.
या कार्यशाळेला प्रिंट, इलेक्ट्रॉनिक आणि डिजिटल माध्यमांतील (वेब न्यूज पोर्टल्स व सोशल मीडिया) प्रतिनिधींनी उत्स्फूर्त प्रतिसाद दिला. पत्रकारांच्या शंकांचे निरसन करताना पोलीस अधीक्षकांनी सांगितले की, कायद्याची अचूक माहिती समाजापर्यंत पोहोचवण्यासाठी पत्रकार हे पोलीस आणि नागरिक यांच्यातील महत्त्वाचा दुवा आहेत.
या उपक्रमामुळे जळगाव जिल्ह्यातील पत्रकार आणि पोलीस प्रशासन यांच्यात समन्वय अधिक दृढ झाला असून, नवीन कायद्यांची अंमलबजावणी करताना नागरिकांना होणारे फायदे आणि पारदर्शकतेसाठी करण्यात आलेल्या उपाययोजना प्रभावीपणे जनतेपर्यंत पोहोचणार आहेत. जळगाव पोलीस दलाच्या या संवादात्मक आणि पारदर्शक भूमिकेचे सर्व स्तरांतून स्वागत होत आहे.
