नवराज्य Live न्यूज नेटवर्क
पाळधी येथे जिल्हा परिषद माजी सदस्य प्रतापराव पाटील यांच्या वाढदिवसानिमित्त विविध सेवाभावी उपक्रमांचे आयोजन करून वाढदिवस उत्साहात आणि सामाजिक बांधिलकी जपत साजरा करण्यात आला. जीपीएस ग्रुपतर्फे मंगळवारी अत्याधुनिक फिरते नेत्रालय, घंटागाडीचे लोकार्पण तसेच रक्तदान शिबिराचे आयोजन करण्यात आले. “सेवा हेच खरे व्रत” या भावनेतून पालकमंत्री गुलाबराव पाटील यांच्या मार्गदर्शनाखाली, प्रतापराव पाटील व विक्रम पाटील यांच्या पुढाकारातून हा उपक्रम राबविण्यात आला.
मंगळवारी सकाळी ८ ते सायंकाळी ७ वाजेदरम्यान पाळधी येथील शासकीय विश्रामगृह व गाव परिसरात विविध कार्यक्रम पार पडले. यावेळी अत्याधुनिक फिरत्या नेत्रालयाचा शुभारंभ करण्यात आला. ही सेवा गावोगावी जाऊन नागरिकांची नेत्र तपासणी करणार असून, तपासणीनंतर गरजू रुग्णांना मोफत चष्मे देण्यात येणार आहेत. तसेच शस्त्रक्रियेची गरज असलेल्या रुग्णांना पुढील उपचारासाठी पनवेल येथील अत्याधुनिक रुग्णालयात पाठविण्यात येणार आहे.
यासोबतच विद्यार्थ्यांना वह्या, पेन, पेन्सिलचे वाटप करण्यात आले. आरोग्य केंद्रात रुग्णांना फळांचे वितरण करण्यात आले, तसेच गरजूंना अन्नदानही करण्यात आले. दोन दिवसांपूर्वी आयोजित रक्तदान शिबिरात ५५ रक्तदात्यांनी उत्स्फूर्त सहभाग नोंदवून सामाजिक बांधिलकी जपली.
दरम्यान, नगरपरिषद नशिराबादला प्राप्त झालेल्या आधुनिक अग्निशमन वाहनाचे लोकार्पण करण्यात आले. तसेच पाळधी बु. ग्रामपंचायतीतर्फे गावाच्या स्वच्छतेसाठी घंटागाडीचेही लोकार्पण करण्यात आले.
या कार्यक्रमास शिवसेना तालुका प्रमुख शिवराज पाटील, डी. ओ. पाटील, सरपंच विजय पाटील, शरद कोळी, माजी सभापती सचिन पवार, माजी सभापती मुकुंदराव नन्नवरे, उपमहापौर मनोज चौधरी, श्याम कोगटा, उपनगराध्यक्ष विजय महाजन, जि.प.चे माजी उपाध्यक्ष लालचंद पाटील, नगराध्यक्ष योगेश पाटील यांच्यासह विविध पक्षांचे पदाधिकारी, कार्यकर्ते, महिला आघाडीच्या पदाधिकारी व ग्रामस्थ मोठ्या संख्येने उपस्थित होते.
या सर्व उपक्रमांमुळे प्रतापराव पाटील यांचा वाढदिवस सामाजिक संदेश देणाऱ्या आणि प्रेरणादायी पद्धतीने साजरा करण्यात आला.
