नवराज्य Live न्यूज नेटवर्क
जळगावातील पिंप्राळा परिसरात अवैध गुटखा विक्रीवर रामानंदनगर पोलिसांनी मोठी कारवाई करत सुमारे १ लाख ६६ हजार ७१९ रुपयांचा प्रतिबंधित माल जप्त केला. या प्रकरणी एका संशयिताला अटक करण्यात आली आहे.
मिळालेल्या माहितीनुसार, पिंप्राळा येथील इंद्रनील हौसिंग सोसायटीमध्ये मंगळवारी रात्री ८.४८ वाजता पोलिसांनी छापा टाकला. संशयिताच्या घराच्या परिसरात तसेच वाहनात विक्रीसाठी साठवून ठेवलेला विविध कंपन्यांचा गुटखा, पान मसाला आणि सुगंधित तंबाखू मोठ्या प्रमाणात आढळून आला.
या प्रकरणी अन्न व औषध प्रशासन विभागाच्या अन्न सुरक्षा अधिकारी पद्मजा सुनील कढरे यांनी फिर्याद दिली. त्यानुसार सुरेश सुखदेव नरवाडे (वय ५१, रा. पिंप्राळा, जळगाव) याच्याविरुद्ध अन्न सुरक्षा व मानके कायदा २००६ तसेच संबंधित नियमांनुसार गुन्हा दाखल करण्यात आला आहे.
या कारवाईमुळे परिसरात खळबळ उडाली असून, पुढील तपास पोलिस उपनिरीक्षक संजय तडवी करीत आहेत.
