जळगाव – पंचायत समितीत खासदार स्मिताताई वाघ यांच्या अध्यक्षतेखाली विविध शासकीय योजनांचा आढावा घेण्यासाठी महत्त्वपूर्ण बैठक पार पडली. या बैठकीत घरकुल, समाजकल्याण, महिला व बालकल्याण तसेच इतर विकास योजनांच्या अंमलबजावणीचा सखोल आढावा घेण्यात आला.
घरकुल योजनेअंतर्गत अनेक लाभार्थ्यांचे हप्ते प्रलंबित असल्याचे निदर्शनास आल्याने संबंधित अधिकाऱ्यांना तात्काळ कार्यवाही करून निधी वितरित करण्याचे स्पष्ट निर्देश देण्यात आले. “योजना वेळेत पोहोचल्या नाहीत, तर त्याचा फटका सामान्य नागरिकांना बसतो,” असे खासदार वाघ यांनी स्पष्ट केले.
यावेळी त्यांनी समाजकल्याण, वित्त आयोग, सेस फंड, सिंचन विहीर व गाय-गोठा अनुदान योजनांचा आढावाही घेतला. सर्व योजना पारदर्शक पद्धतीने आणि वेळेत लाभार्थ्यांपर्यंत पोहोचवाव्यात, अशा सूचना त्यांनी दिल्या. प्रलंबित प्रकरणे निकाली काढण्यासाठी विशेष मोहिम राबविण्याचेही आदेश देण्यात आले.
महिला सक्षमीकरणावर भर देताना बचत गटांना प्रशिक्षण, आर्थिक सहाय्य व बाजारपेठ उपलब्ध करून देण्याची गरज त्यांनी व्यक्त केली. “ग्रामीण भागातील महिला स्वावलंबी झाल्यास गावाच्या अर्थव्यवस्थेला बळ मिळेल,” असेही त्यांनी नमूद केले.
या बैठकीस विविध विभागांचे अधिकारी, पदाधिकारी व कर्मचारी मोठ्या संख्येने उपस्थित होते.
