नवराज्य Live न्यूज नेटवर्क
जळगाव (प्रतिनिधी) – भारतीय जनता पक्षाच्या स्थापना दिनानिमित्त जिल्ह्यात विविध कार्यक्रमांचे आयोजन करण्यात आले. यावेळी पक्षाच्या जडणघडणीत मोलाचा वाटा उचलणाऱ्या ४६ ज्येष्ठ कार्यकर्त्यांचा गौरव करण्यात आला.
जळगाव महानगर शाखेतर्फे भाजप कार्यालय (जीएम फाउंडेशन) तसेच बळीराम पेठेतील जुन्या भाजप कार्यालयात पक्षध्वजवंदनाचा कार्यक्रम पार पडला. सकाळी सुमारे ८:३० वाजता ज्येष्ठ कार्यकर्ते मधुकर मांडवे यांच्या हस्ते ध्वजारोहण करण्यात आले.
यावेळी जिल्ह्यात भाजप वाढविण्यात महत्त्वाची भूमिका बजावणाऱ्या कार्यकर्त्यांच्या योगदानाची आठवण करून देण्यात आली. तसेच ४६ ज्येष्ठ कार्यकर्त्यांना स्मृतिचिन्ह, पक्षाचा गमछा व तांदळाचा दिवा देऊन सन्मानित करण्यात आले.
कार्यक्रमाला आमदार सुरेश भोळे, महापौर दीपमाला काळे यांच्यासह अनेक पदाधिकारी उपस्थित होते. स्थायी समिती सभापती डॉ. चंद्रशेखर पाटील, मनपा सभागृह नेते नितीन लढा, गटनेते प्रकाश बावळे, उदय भोलगाव, जिल्हा सरचिटणीस राजेंद्र सोनवणे, विशाल त्रिपाठी, महिला अध्यक्षा नीता परदेशी, युवा मोर्चा अध्यक्ष महेश पाटील यांचीही उपस्थिती होती.
प्रास्ताविक जिल्हाध्यक्ष दीपक सूर्यवंशी यांनी केले. प्रमुख मार्गदर्शन सदाशिव पाटील यांनी करत भाजप हा पक्ष कार्यकर्त्यांच्या बळावर उभा असल्याचे सांगितले. गजानन जोशी यांनी जुन्या आठवणींना उजाळा दिला. आमदार सुरेश भोळे यांनीही कार्यकर्त्यांना मार्गदर्शन केले.
कार्यक्रमात पदाधिकारी, सदस्य व कार्यकर्त्यांची मोठ्या संख्येने उपस्थिती होती.
