नवराज्य Live न्यूज नेटवर्क
जळगाव : जळगाव शहर महानगरपालिकेच्या महासभेमध्ये गाजलेल्या प्रसाधनगृह स्वच्छतेच्या प्रश्नावर महापौर दीपमाला काळे यांनी तातडीने पावले उचलली आहेत. बुधवारी (१ एप्रिल) महापालिकेत आयोजित विशेष बैठकीत महापौरांनी संबंधित विभागाच्या अधिकाऱ्यांची झाडाझडती घेत, कामात हलगर्जीपणा करणाऱ्या शौचालय ठेकेदाराला अंतिम नोटीस देऊन प्रसंगी त्याचा मक्ता (ठेका) रद्द करण्याचे कठोर आदेश दिले आहेत.
प्रसाधनगृहांची दुरवस्था आणि सुरक्षा ऐरणीवर
महासभेत स्थानिक नगरसेवक तथा शिवसेना गटनेते विष्णू भंगाळे, नगरसेविका अर्चना संजय पाटील यांनी मार्केटमधील प्रसाधनगृहांच्या दुरवस्थेचा प्रश्न उपस्थित केला होता. या पार्श्वभूमीवर आयोजित बैठकीत नवीन व जुन्या बीजे मार्केट असोसिएशनच्या पदाधिकाऱ्यांनी समस्यांचा पाढाच वाचला. जुन्या बीजे मार्केटमधील कारंजा नादुरुस्त असणे, रात्रीच्या वेळी विद्युत दिव्यांअभावी पसरणारा अंधार आणि त्यातून होणारे गैरप्रकार, ट्रान्सपोर्ट कंपन्यांच्या अतिक्रमणामुळे तुटलेली गेट्स आणि वाहन पार्किंगची समस्या, ज्येष्ठ नागरिकांसाठी लिफ्टची कमतरता आदी समस्या सांगितल्या.
नगरसेवकांनी व्यक्त केला संताप
नगरसेवक विष्णू भंगाळे यांनी सांगितले की, “शौचालयांच्या अस्वच्छतेमुळे मार्केटमध्ये प्रचंड दुर्गंधी पसरली असून व्यापाऱ्यांना व ग्राहकांना तेथे उभे राहणे कठीण झाले आहे.” तर नगरसेविका अर्चना पाटील यांनी मार्केटमध्ये रॅम्प नसल्याने होणारी अडचण आणि सुरक्षा व्यवस्थेच्या अभावामुळे निर्माण झालेला गंभीर प्रश्न मांडला. प्रसाधनगृहात ठेकेदार भंगार साठवून ठेवत असल्याची बाबही त्यांनी निदर्शनास आणून दिली.
महापौरांचे कडक निर्देश
सर्व तक्रारी ऐकून घेतल्यानंतर महापौर दीपमाला काळे यांनी प्रशासनाला पुढील आदेश दिले.
ठेकेदारावर कारवाई: प्रसाधनगृहाची स्वच्छता न राखणाऱ्या ठेकेदाराला नोटीस द्या आणि समाधानकारक उत्तर न मिळाल्यास त्याचा ठेका तात्काळ रद्द करून नवीन नियुक्ती करा.
स्वच्छता अभियान: महापौरांच्या संकल्पनेतून येत्या शुक्रवारी बी.जे. मार्केटमध्ये विशेष ‘साफसफाई अभियान’ राबवले जाईल. त्यापूर्वी गुरुवारी अधिकारी प्रत्यक्ष जागेची पाहणी करतील.
लिफ्ट आणि पायाभूत सुविधा: मार्केटमध्ये लिफ्ट बसवण्यासाठी तांत्रिक इस्टिमेट (अंदाजपत्रक) तयार करण्याचे आदेश महापौरांनी बांधकाम विभागाला दिले.
या बैठकीला उपमहापौर मनोज चौधरी, स्थायी समिती सभापती डॉ. चंद्रशेखर पाटील, शिवसेनेचे गटनेते विष्णू भंगाळे, नगरसेविका अर्चना पाटील, आशा पाटील, नगरसेवक अमित काळे, सहाय्यक आयुक्त उदय पाटील, स्वच्छता अधिकारी अनिल कांबळे, पाणीपुरवठा प्रमुख शामकांत भंडारकर, अतिक्रमण विभागाचे संजय ठाकूर, विद्युत विभागाचे संदीप मोरे यांच्यासह आरोग्य, बांधकाम विभागाचे कर्मचारी उपस्थित होते.
“गेल्या १५ वर्षांत आम्हाला समस्या मांडण्यासाठी महापालिकेत कधीही बोलावले गेले नव्हते. महापौरांनी स्वतःहून स्वारस्य दाखवून आमची बाजू ऐकून घेतली, त्याबद्दल आम्ही आभारी आहोत.”
— असोसिएशन पदाधिकारी
