रस्त्याच्या कामावरून ठेकेदाराकडून सभापतींना शिवीगाळ; धमकीची गंभीर घटना
खोटे नगर-दादावाडी परिसरात प्रकार; ठेकेदाराविरुद्ध गुन्हा दाखल करण्याची तयारी
नवराज्य Live न्यूज नेटवर्क
जळगाव : शहरातील खोटे नगर-दादावाडी परिसरात रस्त्याच्या कामावरून ठेकेदाराने जळगाव महानगरपालिकेच्या सभापतींना शिवीगाळ करत धमक्या दिल्याची धक्कादायक घटना समोर आली आहे. ही घटना काल रात्री घडली असून शहरात कायदा व सुव्यवस्थेचा प्रश्न पुन्हा एकदा ऐरणीवर आला आहे.
माहितीनुसार, संबंधित भागात भूमिगत गटारीचे काम पूर्ण झाल्यानंतरच रस्त्याचे काम करावे, असे सभापतींनी ठेकेदाराला सांगितले होते. यावरून संतप्त झालेल्या ठेकेदाराने सभापतींना शिवीगाळ करत धमक्या दिल्याचे सांगितले जात आहे.
या घटनेनंतर सभापतींनी महापौर, उपमहापौर तसेच आयुक्तांना संपूर्ण प्रकाराची माहिती दिली आहे. याप्रकरणी संबंधित ठेकेदाराविरुद्ध कठोर कारवाई करण्यात येणार असल्याची माहिती समोर येत आहे. तसेच, पोलिसांत गुन्हा दाखल करण्याची प्रक्रिया सुरू असल्याचेही सूत्रांकडून कळते.
दरम्यान, जळगाव शहरात वाढत्या गुन्हेगारी घटनांमुळे नागरिकांमध्ये भीतीचे वातावरण निर्माण झाले आहे. सार्वजनिक प्रतिनिधींनाच अशा प्रकारच्या धमक्या दिल्या जात असतील, तर सामान्य नागरिकांच्या सुरक्षेचे काय, असा सवाल उपस्थित केला जात आहे.
या घटनेमुळे प्रशासन आणि पोलिस यंत्रणेपुढे कायदा व सुव्यवस्था राखण्याचे मोठे आव्हान उभे राहिले आहे.
