शासकीय वसतिगृहात आयटीआय विद्यार्थ्याची गळफास
नवराज्य Live न्यूज नेटवर्क
जळगाव- शहरातील शासकीय वसतिगृहातून एक धक्कादायक घटना समोर आली आहे. येथे राहणाऱ्या १८ वर्षीय विद्यार्थ्याने राहत्या खोलीत गळफास घेऊन आत्महत्या केल्याची घटना मंगळवारी दुपारी उघडकीस आली. मृत विद्यार्थ्याचे नाव रोहित समाधान पवार (वय १८, रा. निंभोरा ता. धरणगाव) असे आहे. तो जळगाव येथील शासकीय आयटीआयमध्ये शिक्षण घेत होता आणि शासकीय वसतिगृहात राहत होता.
मंगळवारी सकाळी रोहितचे वडील समाधान पवार आणि काका त्याला भेटण्यासाठी वसतिगृहात आले होते. त्यावेळी पोटात दुखत असल्यामुळे आज कॉलेजला गेलो नसल्याचे रोहितने वडिलांना सांगितले होते. काही वेळाने वडील गावी परतल्यानंतर दुपारी सुमारे ३ वाजेच्या सुमारास रोहितने राहत्या खोलीत गळफास घेतला.दरम्यान, दुपारी कॉलेजवरून परतलेल्या त्याच्या रूममेट सागर शिरोळ याला हा प्रकार दिसून आला. त्यानंतर रोहितला तातडीने शासकीय वैद्यकीय महाविद्यालय व रुग्णालयात दाखल करण्यात आले. मात्र वैद्यकीय अधिकाऱ्यांनी तपासून त्याला मृत घोषित केले.दरम्यान, रोहितच्या वडिलांनी या घटनेबाबत संशय व्यक्त करत सखोल चौकशीची मागणी केली आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
इन्स्टाग्राम स्टेटसमुळे वाढले गूढ
आत्महत्येपूर्वी रोहितने आपल्या इन्स्टाग्राम अकाउंटवर एक सूचक स्टेटस ठेवले होते. त्यात “इन्स्टाग्राम अकाउंटला समस्या येत असल्याने आजपासून अकाउंट बंद करत आहे. कोणीही मेसेज करू नये. कोणाला काही वाईट मेसेज गेले असतील तर माफ करा,” असा मजकूर होता. या स्टेटसमुळे या प्रकरणाबाबत अधिक गूढ निर्माण झाले आहे.
