पर्यटन विकास प्रकल्पात हलगर्जीपणा; लोखंडी पाइपऐवजी लाकूड वापरल्याने स्लॅब कोसळून ७ मजूर जखमी
पाळधीतील साई भक्त निवास बांधकामस्थळी दुर्घटना; दोन मजुरांची प्रकृती गंभीर
नवराज्य Live न्यूज नेटवर्क
जळगाव पाळधी ता. धरणगाव – येथील साईबाबा मंदिर परिसरात सुरू असलेल्या भक्त निवासाच्या बांधकामादरम्यान मोठी दुर्घटना घडली. पर्यटन विकास प्रकल्पांतर्गत सुरू असलेल्या या कामात लोखंडी पाइपऐवजी लाकूड व बल्ल्या वापरल्याने स्लॅब कोसळल्याची बाब समोर आली असून यात सात मजूर जखमी झाले आहेत. जखमींपैकी दोन मजुरांची प्रकृती गंभीर असल्याची माहिती मिळाली आहे.
ही घटना दुपारी सुमारे दोन वाजेच्या सुमारास घडली. जखमी मजुरांना तातडीने उपचारासाठी जळगाव येथील रुग्णालयात हलविण्यात आले.
मिळालेल्या माहितीनुसार, पाळधी येथील साई बाबा मंदिर पाळधी परिसराचा विकास पर्यटन विकास प्रकल्पाअंतर्गत कोट्यवधी रुपयांच्या निधीतून करण्यात येत आहे. गेल्या वर्षभरापासून या परिसरात विविध बांधकामांची कामे सुरू आहेत. मात्र स्लॅबचे काम सुरू असतानाच अचानक स्लॅब कोसळल्याने घटनास्थळी एकच गोंधळ उडाला.
घटनेनंतर जखमी मजुरांना तातडीने रुग्णालयात दाखल करण्यात आले असून त्यांच्यावर उपचार सुरू आहेत. या दुर्घटनेमुळे बांधकामस्थळी कामगारांच्या सुरक्षेबाबत गंभीर प्रश्न निर्माण झाला आहे. कामगारांना आवश्यक असलेली सुरक्षा साधने, हेल्मेट, सुरक्षा बूट उपलब्ध करून देण्यात आली होती का, तसेच कामगारांचा विमा काढण्यात आला होता का, याबाबतही आता चौकशी होण्याची शक्यता व्यक्त केली जात आहे.
प्राथमिक माहितीनुसार, स्लॅबला आधार देण्यासाठी अखंड लोखंडी पाइप वापरणे आवश्यक होते, मात्र त्या ठिकाणी लाकूड व बल्ल्या वापरण्यात आल्याने स्लॅब पत्त्यांच्या घरासारखा कोसळला आणि ही दुर्घटना घडल्याचे सांगितले जात आहे.
◼ लोखंडी पाइप वापरायला हवे होते – ट्रस्ट सदस्य
पाळधी येथील साईबाबा मंदिरातील भक्त निवासाचे बांधकाम शासनाच्या महाराष्ट्र टुरिसम डेव्हलोपमेंट कॉर्पोरेशन अंतर्गत करण्यात येत आहे. या कामाचा ठेका कंत्राट पद्धतीने देण्यात आला आहे.
स्लॅब मोठा व उंच असल्याने त्याला लोखंडी पाइपचा मजबूत आधार देणे आवश्यक होते, मात्र त्या ठिकाणी लाकूड वापरण्यात आल्याने ही दुर्घटना घडल्याची माहिती साईबाबा मंदिर ट्रस्टचे सदस्य सुनील झवर यांनी दिली.
