नवराज्य Live न्यूज नेटवर्क
जळगाव : महानगरपालिकेच्या अत्यंत महत्त्वाच्या मानल्या जाणाऱ्या समित्यांच्या निवडीत आज महत्त्वाचा निर्णय झाला. शहरातील विकासकामे, विविध योजना तसेच निधीच्या तरतुदींसाठी महत्त्वपूर्ण भूमिका बजावणाऱ्या स्थायी समितीच्या सभापतीपदी डॉ. चंद्रशेखर पाटील, तर महिला व बालकल्याण समितीच्या सभापतीपदी सिंधुताई कोल्हे यांची बिनविरोध निवड करण्यात आली.
या निवड प्रक्रियेत पिठासीन अधिकारी म्हणून जिल्हा परिषदेच्या मुख्य कार्यकारी अधिकारी मीनल करनवाल यांनी काम पाहिले. यावेळी महापालिका आयुक्त ज्ञानेश्वर ढेरे, नगरसचिव सतीश शुक्ला यांच्यासह सभागृहातील सदस्य उपस्थित होते.
स्थायी सभापतीपदासाठी सूचक नितीन लढ्ढा व अनुमोदक विशाल भोळे, तर महिला व बालकल्याण सभापतीपदासाठी सूचक प्रतिभा देशमुख व अनुमोदक डॉ. अमृता सोनवणे होते.
बिनविरोध निवड झाल्यानंतर सभागृहात सदस्यांनी टाळ्यांच्या गजरात अभिनंदन केले. तर सभागृहाबाहेर ढोल-ताशांच्या गजरात, फटाक्यांच्या आतषबाजीत नवनिर्वाचित सभापतींचे जल्लोषात स्वागत करण्यात आले.
निवडीनंतर प्रतिक्रिया देताना डॉ. चंद्रशेखर पाटील म्हणाले, “सामान्य कार्यकर्त्याला न्याय मिळाला असून नागरिकांच्या अपेक्षांनुसार विकासकामांना प्राधान्य देणार आहे.”
तर सिंधुताई कोल्हे यांनी, “महिला, बालकल्याण व सामाजिक प्रश्नांवर सर्वांना सोबत घेऊन प्रभावी काम केले जाईल,” असे सांगितले.
