नवराज्य Live न्यूज नेटवर्क
जळगाव – मेहरुण येथील श्री संत ज्ञानेश्वर प्राथमिक व माध्यमिक विद्यालय, मेहरुण येथे इयत्ता दहावीच्या विद्यार्थ्यांचा निरोप समारंभ उत्साहपूर्ण वातावरणात पार पडला. कार्यक्रमाला शिक्षकवृंद, व आजी माजी विद्यार्थ्यांची मोठ्या संख्येने उपस्थिती लाभली.
समारंभाच्या प्रारंभी मान्यवरांच्या हस्ते दीपप्रज्वलन करून कार्यक्रमाची सुरुवात करण्यात आली. विद्यार्थ्यांनी मनोगत व्यक्त करताना शालेय जीवनातील आठवणींना उजाळा दिला. काही विद्यार्थ्यांनी गीत व मनोगत सादर करून उपस्थितांना भावूक केले.
या प्रसंगी दहावीच्या विद्यार्थ्यांनी कृतज्ञतेच्या भावनेतून विद्यालयाला इन्व्हर्टर भेट स्वरूपात प्रदान केला. विद्यार्थ्यांच्या या उपक्रमाचे सर्वांनी कौतुक केले. या भेटीमुळे विद्यालयाच्या सुविधां मध्ये भर पडणार असल्याचे मुख्याध्यापक श्री. मुकेश नाईक यांनी सांगितले.
कार्यक्रमाचे अध्यक्ष प्रशांत सुरेश नाईक यांनी विद्यार्थ्यांना पुढील वाटचालीस शुभेच्छा देत परिश्रम व शिस्त यांचे महत्त्व पटवून दिले. उत्कृष्ट विद्यार्थिनी म्हणून तरन्नुम मुस्ताक तडवी ह्या विद्यार्थिनीला गौरविण्यात आले.
कार्यक्रमाला संचालिका अर्चना नाईक ,भागवत सानप, युवराज सानप, जितेंद्र नाईक ,एकनाथ वाघ, पर्यवेक्षिका शितल कोळी ,पर्यवेक्षक निलेश पवार यांची उपस्थिती होती. सूत्रसंचालन कविता सानप तर शेवटी आभार प्रदर्शन रूपाली आव्हाड यांनी केले. हा निरोप समारंभ विद्यार्थ्यांसाठी भावनिक व प्रेरणादायी ठरला.
