नवराज्य Live न्यूज नेटवर्क
जळगाव – शासकीय मुरूम चोरीप्रकरणी दोषींवर कारवाई करण्याऐवजी जाब विचारणाऱ्या लोकप्रतिनिधीवरच गुन्हा दाखल केला जात असल्याने, हे प्रशासनाचे अपयश असून अन्यायाविरुद्ध आपली लढाई सुरूच राहील, अशी ठाम भूमिका माजी मंत्री व राष्ट्रवादी काँग्रेस (शरद पवार गट) नेते एकनाथराव खडसे यांनी व्यक्त केली आहे.
सावदा परिसरात सुमारे अडीच महिन्यांपूर्वी ४० ते ५० हजार ब्रास शासकीय मुरूम चोरी झाल्याची तक्रार पुराव्यासह करण्यात आली होती. संबंधित व्यक्तीने व्हिडिओ व ऑडिओ स्वरूपात पुरावे सादर करूनही सुरुवातीला पोलिसांनी ही तक्रार महसूल विभागाकडे वर्ग केली. डिसेंबर महिन्यात विधानसभेत हा मुद्दा उपस्थित केल्यानंतरच इरिगेशन विभागाकडून गुन्हा दाखल करण्यात आला. मात्र, एफआयआर होऊनही तपासात कोणतीही ठोस कारवाई न झाल्याचा आरोप आ.खडसे यांनी केला आहे.
या पार्श्वभूमीवर अडीच महिने उलटूनही मुरूम चोरांवर कारवाई का झाली नाही, याचा जाब विचारण्यासाठी आ.खडसे सावदा पोलीस ठाण्यात गेले होते. यावेळी पोलीस निरीक्षक विशाल पाटील यांनी उद्दाम वर्तन करत, “मी माझ्या पद्धतीने चौकशी करतो, मला कोणाचे बंधन नाही,” असे उत्तर दिल्याचा आरोप खडसे यांनी केला. संवादादरम्यान काही अपशब्द वापरले गेल्याने त्यांनी माफीही मागितली होती.
मात्र, सावदा पोलीस ठाण्याच्या हद्दीत सुरू असलेल्या अवैध धंदे व भ्रष्टाचाराबाबत लाचलुचपत प्रतिबंधक विभागाकडे तक्रार करण्याची भूमिका घेतल्यानंतर, सूडबुद्धीने आपल्यावरच गुन्हा दाखल करण्यात आल्याचा गंभीर आरोप आ.खडसे यांनी केला आहे.
“शासनाचा मुरूम चोरीला गेला, त्याचे ठोस पुरावे असूनही दोषींवर कारवाई होत नाही. उलट, भ्रष्टाचारावर आवाज उठवला म्हणून माझ्यावर गुन्हा दाखल केला जातो. हा अन्याय असून याविरोधात मी कायदेशीर लढाई लढणारच,” असे खडसे यांनी स्पष्ट केले. मुरूम चोरीप्रकरणाचा पाठपुरावा वरिष्ठ पातळीवर सुरूच ठेवणार असल्याचेही त्यांनी सांगितले.
