जळगाव महापालिकेत भाजपचा निर्विवाद दबदबा; गटनेतेपदी प्रकाश बालाणीयांची नियुक्ती
४६ जागांवर विजय; नाशिक येथे गटनोंदणीदरम्यान गटनेतेपदाची निवड
नवराज्य Live न्यूज नेटवर्क
जळगाव – जळगाव महानगरपालिकेच्या निवडणुकीत तब्बल ४६ जागा जिंकत बहुमताच्याही पुढे गेलेल्या भारतीय जनता पक्षाने महापालिकेवर निर्विवाद वर्चस्व प्रस्थापित केले आहे. या यशानंतर महापालिकेतील महापौर पदासह विषय समित्यांच्या विविध पदांसाठी अनेक इच्छुक पुढे आल्याचे चित्र दिसून येत आहे. मात्र, गटनेतेपदासाठी कोणाचीही विशेष उत्सुकता दिसून आली नाही.
दरम्यान, जळगाव महानगरपालिकेच्या भाजप गटनेतेपदाची अधिकृत निवड जळगावमध्ये न होता थेट नाशिक येथे करण्यात आल्याने राजकीय वर्तुळात चर्चेला उधाण आले आहे. पक्षातर्फे नाशिक येथील विभागीय आयुक्त कार्यालयात भाजप नगरसेवक गटाची औपचारिक नोंदणी करण्यात आली. याच वेळी प्रकाश बालाणी यांची गटनेतेपदी नियुक्ती, नितीन बरडे यांची उपगटनेतेपदी, तर डॉ. चंद्रशेखर पाटील यांची प्रतोदपदी निवड करण्यात आली.
