नवराज्य LIve डिजिटल न्यूज नेटवर्क by योगेश सुने
जळगाव : जळगाव महानगरपालिका निवडणूक २०२५-२६ साठी प्रसिद्ध झालेल्या प्रारूप मतदारयादीत मोठ्या प्रमाणावर त्रुटी उघड झाल्याचा गंभीर आरोप भाजपने करत, त्या तातडीने सुधारण्यासाठी विशेष दुरुस्ती मोहीम राबवावी, तसेच हरकती नोंदवण्याची मुदत वाढवावी, अशी मागणी महापालिकेकडे निवेदनाद्वारे केली. सहाय्यक आयुक्त धनश्री शिंदे यांना आज भाजप शिष्टमंडळाने निवेदन सादर केले.
भाजपच्या म्हणण्यानुसार, २० नोव्हेंबर २०२५ रोजी जाहीर करण्यात आलेल्या प्रारूप मतदारयादीत अनेक मूलभूत चुका आढळतात. नागरिकांची नावे चुकीच्या प्रभागात, एकाच व्यक्तीची नावे दोन ते तीन ठिकाणी, काही मतदारांचे छायाचित्र चुकीचे, तर संपूर्ण कुटुंबच वेगळ्या प्रभागात स्थलांतरित दाखविणे—अशा गंभीर तृटींमुळे मतदारांची गैरसोय वाढली आहे.
इतकेच नव्हे तर मृत व्यक्तींची नावे अद्यापही मतदारयादीत दिसत असल्याचा धक्कादायक मुद्दा भाजपने मांडला. या सर्व त्रुटींमुळे नागरिकांत संभ्रम आणि नाराजी पसरत असल्याचे भाजपने स्पष्ट केले.
महापालिकेने दुरुस्ती फॉर्म दिले असले तरी प्रक्रिया अत्यंत गुंतागुंतीची असल्याचे भाजपचे म्हणणे आहे. प्रत्येकाने स्वतंत्रपणे संपूर्ण माहिती भरणे कठीण असून, अनेक प्रभागांमध्ये २ ते ३ हजार त्रुटी असल्याने सर्व दुरुस्ती वेळेत होणे जवळजवळ अशक्य असल्याचे पक्षाने निदर्शनास आणले.
भाजप पदाधिकारी मोठ्या संख्येने उपस्थित
निवेदन सादरीकरणावेळी जिल्हाध्यक्ष दीपक सूर्यवंशी, सरचिटणीस नितीन इंगळे व राहुल वाघ, पितांबर भावसार, मिलिंद चौधरी, भूषण लाडवंजारी, रेखा वर्मा, गोपाळ पोपटानी, शक्ती महाजन, नितू परदेशी, आनंद सपकाळे, दीपमाला काळे, विनोद मराठे, अजित राणे, अतुल बारी, सुचिता हाडा, अमित काळे, महेश चौधरी, जितेंद्र मराठे, कैलास सैंदाणे, तिलोत्तमा पाटील, निलेश तायडे, धनंजय पाटील, सुनील भारंबे, दिनेश अत्तरडे, अमोल धांडे यांच्यासह अनेक पदाधिकारी उपस्थित होते.
————————————
