नवराज्य Live डिजिटल न्यूज नेटवर्क
जळगाव – बीएसएनएलने देशभरात सुरू केलेल्या आधुनिकीकरण मोहिमेचा प्रभाव आता जळगाव शहरातही स्पष्टपणे दिसत आहे. पारंपरिक कॉपर वायरद्वारे दिल्या जाणाऱ्या टेलिफोन व इंटरनेट सेवांना हळूहळू बंद करून त्या जागी उच्चगती फायबर ऑप्टिक कनेक्शन बसवण्याची मोठी प्रक्रिया सध्या सुरू आहे.
शहरातील अंदाजे ३,००० बीएसएनएल ग्राहकांपैकी १,८०० कनेक्शन फायबरवर स्थलांतरित करण्यात आले आहेत. उर्वरित १,२०० जुनी कॉपर वायर सेवा अजूनही वापरत आहेत; मात्र यावर इंटरनेटचा वेग अत्यंत कमी होत असल्याने ग्राहक त्रस्त झाले आहेत.
फायबर कनेक्शनसाठी बसवले जाणारे उपकरण सतत वीज पुरवठ्यावर चालते. वीज गेल्यास इंटरनेट आणि टेलिफोन दोन्ही सेवा ठप्प होतात. त्यामुळे ग्राहकांकडे इन्व्हर्टर किंवा पर्यायी वीजव्यवस्था असणे गरजेचे ठरत आहे.
————————————————————————–
📢 कॉपर सेवा पूर्णपणे बंद करण्याची अंतिम तारीख जाहीर
“कॉपर वायरवरील उर्वरित १,२०० कनेक्शन ३१ डिसेंबरपूर्वी फायबरवर रूपांतरित करणे आवश्यक आहे. या तारखेनंतर कॉपरवरील सर्व फोन आणि इंटरनेट सेवा थांबवण्यात येतील. ग्राहकांनी वेळेत रूपांतरण पूर्ण करावे. असे आवाहन बीएसएनएल तर्फे करण्यात आले आहे.
=====================================
बीएसएनएलच्या या उपक्रमामुळे शहरात जलद आणि स्थिर इंटरनेट सेवांचा मार्ग मोकळा होत असला तरी ग्राहकांना नव्या प्रणालीशी जुळवून घेण्यासाठी काहीसे अतिरिक्त तयारीची आवश्यकता राहणार आहे.
———————————
