देवदर्शनापूर्वीच दोघं भावांचा अपघाती मृत्यू

नवराज्य live डिजिटल न्यूज नेटवर्क  

(जामनेर  प्रतिनिधी)  शिरसाळा मारुतीचे दर्शन करण्यासाठी जात असताना दुचाकीला अज्ञात वाहनाने दिलेल्या धडकेत पाळधी (ता. जामनेर) येथील सख्खे चुलत भाऊ ठार झाल्याची घटना शनिवारी पहाटे वाडी किल्ल्याजवळ घडली. कल्पेश समाधान माळी (वय १७) व शुभम भिका माळी (वय २१) अशी मृतांची नावे आहेत.

पाळधी येथील कल्पेश व शुभम हे दोघे पहाटे चार वाजता मारुती रायाचे दर्शनासाठी शिरसाळ्याकडे जात होते. बोदवडमार्गे जात असताना मालदाभाडी–वाडी किल्ला परिसरात अज्ञात वाहनाने त्यांच्या दुचाकीला जोरदार धडक दिली. या अपघातात दोघेही रस्त्याच्या कडील खोल नालीत पडले. गळा व डोक्याला गंभीर दुखापत झाल्याने त्यांचा घटनास्थळीच मृत्यू झाला.

 कुटुंबियांनी  घेतला शोध

सकाळी दर्शनासाठी गेलेले दोघे परत न आल्याने कुटुंबीयांनी शोध घेतला असता रस्त्याच्या कडेला दुचाकी पडलेली दिसली. पुढे पाहणी केली असता दोघेही मृत अवस्थेत आढळून आले. मृतदेह जामनेर उपजिल्हा रुग्णालयात शवविच्छेदनासाठी पाठविण्यात आले.

या प्रकरणी जामनेर पोलिसांत गुन्हा दाखल असून पुढील तपास पोलीस उपनिरीक्षक किशोर पाटील करीत आहेत. सख्या चुलत भावांचा झालेल्या दुर्दैवी मृत्यूने पाळधी गावात शोककळा पसरली आहे.