जळगाव : टेलिफोन नगर येथील रहिवासी व मेकमास्त्र इंजिनिअरिंग प्रा. लि., एमआयडीसी जळगावचे संचालक श्री. किरण भंगाळे यांच्या पत्नी तसेच कवयित्री बहिणाबाई चौधरी उत्तर महाराष्ट्र विद्यापीठाच्या योगशास्त्र विभागातील सहायक प्राध्यापिका डॉ. गीतांजली भंगाळे यांनी निर्वाण विश्वविद्यालय, जयपूर (राजस्थान) येथून योग विषयात पीएच.डी. पदवी संपादन केली आहे.
त्यांनी “विभिन्न योग ग्रंथों में वर्णित मन, मनोविकार और मनोचिकित्सा का एक सैद्धांतिक अध्ययन” या विषयावर संशोधन केले असून हे संशोधनकार्य डॉ. नितीन कुमार यांच्या मार्गदर्शनाखाली पूर्ण झाले. या प्रबंधात मानवी मनाचे चंचल स्वरूप, त्यातून उद्भवणारे तणाव, नैराश्य, चिंता यांसारखे मानसिक विकार आणि त्यावरील योगग्रंथांतील उपाययोजना यांचा सखोल अभ्यास करण्यात आला आहे.
श्रीमद् भगवद्गीतेतील अभ्यास-वैराग्य संकल्पना आणि पतंजल योगसूत्रांतील क्रियायोग व चित्तप्रसादनासाठी सुचविलेली साधने (मैत्री, करुणा, मुदिता) यांचे मनोचिकित्सात्मक महत्त्व स्पष्ट करण्यात आले आहे. योगाच्या माध्यमातून मानसिक आरोग्य सुदृढ ठेवण्याचे प्रभावी मार्ग या प्रबंधातून उलगडले आहेत.
या संशोधनासाठी निर्वाण विश्वविद्यालय, जयपूरचे कुलपती प्रा. एस. एल. गोदरा, रिसर्च डायरेक्टर डॉ. राजेश कुमार कासवान, डॉ. सपना नेहरा व डॉ. पियुष कुमार यांचे मार्गदर्शन लाभले. त्यांच्या या शैक्षणिक यशाबद्दल कवयित्री बहिणाबाई चौधरी उत्तर महाराष्ट्र विद्यापीठाचे कुलगुरू प्रा. व्ही. एल. माहेश्वरी यांनी अभिनंदन केले असून योगशास्त्र विभाग प्रमुख इंजि. राजेश पाटील आणि सहायक प्राध्यापिका डॉ. लीना चौधरी यांचे सहकार्य लाभले.
डॉ. भंगाळे यांच्या या उल्लेखनीय कामगिरीबद्दल शैक्षणिक आणि सामाजिक वर्तुळातून त्यांचे अभिनंदन व कौतुकाचा वर्षाव होत आहे.
