चाळीसगाव, – दि. २१ ऑक्टोबर – चाळीसगाव तालुक्याचे माजी आमदार आणि राष्ट्रवादी काँग्रेस शरद पवार पक्षाचे ज्येष्ठ नेते राजीव दादा देशमुख यांचे हृदयविकाराच्या तीव्र धक्क्याने आज सकाळी दुःखद निधन झाले. त्यांच्या निधनाने चाळीसगाव तालुक्यात तसेच जिल्ह्यात हळहळ व्यक्त करण्यात येत आहे.
मिळालेल्या माहितीनुसार, दादा देशमुख यांना अचानक अस्वस्थता जाणवू लागली. तत्काळ त्यांना जवळच्या रुग्णालयात दाखल करण्यात आले, मात्र उपचारादरम्यान त्यांनी अखेरचा श्वास घेतला. त्यांच्या निधनाची बातमी समजताच राष्ट्रवादी काँग्रेससह सर्व पक्षातील कार्यकर्त्यांमध्ये शोककळा पसरली. राजीव दादा देशमुख यांनी आपल्या राजकीय कारकिर्दीत चाळीसगाव मतदारसंघाचे आमदार म्हणून काम केले असून विकासकामांमध्ये त्यांचा पुढाकार उल्लेखनीय राहिला आहे. प्रामाणिक आणि सर्वसामान्यांमध्ये मिसळणारे नेतृत्व म्हणून त्यांनी आपली वेगळी छाप सोडली होती.
