नवराज्य डिजिटल न्यूज नेटवर्क
जळगाव : ए.टी. झांबरे माध्यमिक विद्यालयाचा इयत्ता आठवीतील विद्यार्थी केतन गिरीश पाटील याने टपाल विभागातर्फे आयोजित आंतरराष्ट्रीय पत्र लेखन स्पर्धेत राज्यस्तरावर द्वितीय क्रमांक मिळवत विद्यालयाचा आणि जळगावचा मान उंचावला आहे. त्याला या यशाबद्दल टपाल विभागाकडून रुपये दहा हजारांचे रोख बक्षीस, प्रमाणपत्र आणि भेटवस्तू देऊन गौरविण्यात आले.
आंतरराष्ट्रीय टपाल दिनानिमित्त ए.टी. झांबरे विद्यालयात आयोजित विशेष कार्यक्रमात केतनचा टपाल विभागाच्या अधिकाऱ्यांच्या हस्ते सत्कार करण्यात आला. या प्रसंगी प्रमुख पाहुणे म्हणून मा. मोहम्मद खदीर (डाक अधीक्षक, जळगाव), मा. टी. एफ. तडवी (सहाय्यक डाक अधीक्षक मुख्यालय), एस. एस. म्हस्के (सहाय्यक डाक अधीक्षक उपविभाग), एस. एस. पाटील (विकास अधिकारी), एस. व्ही. मुंडे (विपणन अधिकारी), डॉ. अशोक राणे (प्राचार्य के.सी.ई. बी.एड. कॉलेज व संचालक, के.सी.ई. सोसायटी), तसेच प्रणिता झांबरे आणि पर्यवेक्षक नरेंद्र पालवे आदी मान्यवर उपस्थित होते.
कार्यक्रमात केतनला दहा हजार रुपयांचा धनादेश व प्रमाणपत्र प्रदान करण्यात आले, तसेच त्याचे पालक यांचाही विशेष सत्कार करण्यात आला. केतनने “महासागराचे मनोगत” या विषयावर प्रभावी पत्र लिहून महासागरातील प्रदूषण, त्याचे परिणाम आणि पर्यावरण संवर्धनाबाबत जनजागृती केली होती.
यापूर्वीही केतनला टपाल विभागाच्या फिलाटेली स्पर्धेत सहा हजार रुपयांची दिनदयाळ शिष्यवृत्ती प्राप्त झाली आहे. त्याच्या या यशाबद्दल संस्थेचे अध्यक्ष प्रा. नंदकुमार बेंडाळे, संचालक मंडळ, मुख्याध्यापक, पर्यवेक्षक, सर्व शिक्षक आणि शिक्षकेतर कर्मचाऱ्यांनी अभिनंदन केले आहे.
या कार्यक्रमासाठी चेतन सोनार, संदेश करलकर, अनिल शिंदे आणि तुषार सोनवणे यांनी सहकार्य केले, तर सूत्रसंचालन श् चंद्रकांत कोळी यांनी केले.
टपाल सेवेमुळे जग एकमेकांशी जोडले गेले आहे — हीच आंतरराष्ट्रीय टपाल दिनाची खरी भावना आहे.”
