नवराज्य डिजिटल न्यूज नेटवर्क by योगेश सुने
जळगाव -आकाशातील दुर्मीळ व थरारक खगोलीय घटना अनुभवण्याची संधी ७ सप्टेंबर २०२५ रोजी रात्रीपासून मिळणार आहे. या दिवशी रात्री सुरू होणारे खग्रास चंद्रग्रहण थेट ८ सप्टेंबरच्या पहाटेपर्यंत चालणार असून तब्बल ५ तास २७ मिनिटे हा अद्भुत देखावा आकाशात झळकणार आहे. चंद्र हळूहळू पृथ्वीच्या विरळ सावलीतून (Penumbral) प्रवेश करून गडद सावलीत (Umbra) जाताना पूर्णपणे आच्छादित होईल व पुन्हा सावलीतून बाहेर येईल. जवळपास १ तास २३ मिनिटे चंद्र पृथ्वीच्या गडद छायेत राहणार असल्याने हे ग्रहण विशेष ठरणार आहे.
या घटनेचा आनंद घेण्यासाठी नागरिकांनी कोणतेही गैरसमज मनात न ठेवता आकाशाकडे पाहावे, असे खगोल अभ्यासकांचे आवाहन आहे.
अशी असणार ग्रहणाची वेळ
🌑 ८:५८ रात्री – चंद्र पृथ्वीच्या विरळ सावलीला (Penumbral) स्पर्श करेल.
🌑 ९:५७ रात्री – गडद सावलीला (Umbra) स्पर्श करून खग्रास ग्रहणाची सुरुवात.
🌑 ११:०० रात्री – चंद्र पूर्ण गडद सावलीत.
🌑 ११:४२ रात्री – चंद्र सावलीच्या मध्यभागी.
🌑 १२:२३ पहाटे – चंद्र पुन्हा विरळ सावलीत.
🌑 १:२६ पहाटे – चंद्र पूर्णपणे विरळ सावलीत.
🌑 २:२५ पहाटे – ग्रहणाची समाप्ती.
एकूण ग्रहणाचा कालावधी ५ तास २७ मिनिटे असून, त्यापैकी १ तास २३ मिनिटे चंद्र गडद छायेत (Umbra) राहणार आहे.
चंद्रग्रहण कसे होते?
अवकाशात पृथ्वीच्या दोन सावल्या पडतात – गडद सावली (Umbra) व विरळ सावली (Penumbra).पृथ्वी सूर्याभोवती आणि चंद्र पृथ्वीभोवती फिरत असल्याने, विशिष्ट स्थितीत चंद्र पृथ्वीच्या सावलीत शिरतो.
पूर्ण सावलीत गेल्यास → खग्रास चंद्रग्रहण.
अंशतः गडद सावलीत गेल्यास → खंडग्रास चंद्रग्रहण.
फक्त विरळ सावलीतून गेल्यास → छायाकल्प चंद्रग्रहण.
समज,गैरसमज बाजूला ठेवण्याचे आवाहन
सध्या पावसाळा सुरू असल्याने ढगाळ वातावरण असण्याची शक्यता आहे. तरीही हवामान अनुकूल असेल तर नागरिकांनी कोणतेही समज-गैरसमज बाजूला ठेवून या दुर्मीळ खगोलीय घटनेचा आनंद घ्यावा, असे आवाहन खगोल अभ्यासक अमोघ जोशी (जळगाव) यांनी केले आहे.
