नवराज्य डिजिटल न्यूज नेटवर्क
जळगाव : ग्रामीण भागातील व शेतकरी कुटुंबातील अनेक विद्यार्थी उच्चशिक्षणासाठी जळगाव शहरात येतात. शिकताना निवास, फी, इतर खर्च याबरोबरच दररोजच्या जेवणासाठी मोठा संघर्ष करावा लागतो. अल्पोपहारासाठीसुद्धा अनेकांकडे पुरेशी रक्कम नसते. अशा विद्यार्थ्यांना आधार देणारी अभिनव संकल्पना म्हणून ‘विद्यार्थी कृतज्ञता वडा-पाव सेवा केंद्र’ रविवारी गणेश कॉलनीत सुरू झाले. प्रत्येक रविवारी सकाळी 7.30 ते 9.30 या वेळेत विद्यार्थ्यांना नि:शुल्क वडा-पाव मिळणार आहे.
या सेवा केंद्राचा शुभारंभ जळगाव जिल्ह्याचे लोकप्रिय माजी जिल्हाधिकारी व महाराष्ट्र लोकसेवा आयोगाचे निवृत्त अध्यक्ष किशोरराजे निंबाळकर व दि. जळगाव पीपल्स को-ऑपरेटिव्ह बँकेचे चेअरमन भालचंद्र पाटील यांच्या हस्ते विद्यार्थ्यांना वडा-पाव देऊन झाला. ही संकल्पना डॉ. प्रसन्नकुमार रेदासनी, भैयासाहेब पाटील आणि त्यांच्या सहकाऱ्यांनी मांडली असून अनेक संवेदनशील नागरिकांच्या सहकार्याने उपक्रम प्रत्यक्षात साकारला.
या माणुसकीच्या उपक्रमाचे कौतुक करताना किशोरराजे निंबाळकर म्हणाले की, “विद्यार्थ्यांना केवळ पोटाची भूक भागणार नाही तर मानसिक आधार आणि आत्मविश्वासही मिळेल.” भालचंद्र पाटील यांनीही या कार्याचे मनःपूर्वक कौतुक केले. त्यांनी जळगाव पीपल्स बँकेकडून ५० हजार, वेगा केमिकल्सकडून ५० हजार अशी दरवर्षी एकूण १ लाख रुपयांची मदत जाहीर केली. तसेच तारा हॉस्पिटल, प्रा. सोमवंशी, विजयसिंग राजपूत आदींनीही उपक्रमासाठी योगदान जाहीर केले.
यावेळी ‘विद्यार्थी कृतज्ञता वडा-पाव’ संकल्पनेवरील ‘सेवा संस्कारांचे गाव, जळगाव माणुसकीचे नाव’ हे मनोज गोविंदवार लिखित गीतही प्रसारित झाले. कार्यक्रमास विविध संस्थांचे मान्यवर, बँकेचे पदाधिकारी व सामाजिक कार्यकर्ते उपस्थित होते. विद्यार्थ्यांना या सेवेचा लाभ घेण्यासाठी व अधिकाधिक दात्यांनी योगदान देण्यासाठी डॉ. प्रसन्नकुमार रेदासनी यांनी आवाहन केले.
