नवराज्य Live न्यूज नेटवर्क
जळगाव : सर्वसामान्य नागरिकांना कायदेशीर बाबींचे सोप्या भाषेत आणि मोफत मार्गदर्शन मिळावे या हेतूने ‘न्याय विश्वास फाउंडेशन’तर्फे साईबाबा मंदिर मेहरूण जळगाव येथे आज पार पडलेल्या तिसऱ्या मोफत कायदेविषयक सल्ला व मार्गदर्शन शिबिराला राज्यभरातून तुफान प्रतिसाद मिळाला. ॲड. अनिकेत उज्ज्वल निकम यांच्या नेतृत्वाखाली पार पडलेल्या या शिबिराचा लाभ घेण्यासाठी जळगाव जिल्ह्यासह महाराष्ट्राच्या विविध भागांतून तब्बल ८०० पेक्षा जास्त नागरिकांनी हजेरी लावली होती.
यापूर्वी पार पडलेल्या दोन शिबिरांमध्ये ६०० हून अधिक नागरिकांनी कायदेशीर सल्ला घेतला होता. जळगावकरांच्या याच विश्वासातून आयोजित करण्यात आलेल्या या तिसऱ्या शिबिराची व्याप्ती यंदा राज्यभर पसरलेली पाहायला मिळाली. जळगाव शहरासह मुंबई, अहिल्यानगर, मालेगाव, शिर्डी, शनिशिंगणापूर, छत्रपती संभाजीनगर, बीड, धुळे, बुलढाणा, सावदा, मुक्ताईनगर, जालना आणि नाशिक अशा विविध शहरांमधून नागरिक आपल्या प्रलंबित कायदेशीर समस्या घेऊन या ठिकाणी उपस्थित झाले होते.मेहरून भागातील साई बाबा मंदिर परिसरात सकाळी १० ते दुपारी १ या वेळेत पार पडलेल्या या शिबिर दरम्यान नागरिकांना कायदेशीर प्रश्नांवर तज्ज्ञ वकिलांच्या पॅनेलद्वारे मोफत व सखोल मार्गदर्शन करण्यात आले. यामध्ये प्रामुख्याने कौटुंबिक वाद, पती-पत्नीमधील तंटे, दिवाणी प्रकरणे, जमीन व मालमत्तेचे वाद, शेतीशी संबंधित तंटे आणि ७/१२ उताऱ्यावरील अडचणी यांवर सविस्तर चर्चा करण्यात आली. याशिवाय फायनान्स, आर्थिक फसवणूक, प्रॉव्हिडंट फंड, सर्व्हिस मॅटर आणि कलम १३८ खालील चेक बाउंसच्या केसेसवरही नागरिकांना कायदेशीर मार्ग दाखवण्यात आला.
सध्याच्या काळात वाढणाऱ्या पोलीस तक्रारी, एफआयआर, प्रलंबित न्यायालयीन प्रकरणे, फौजदारी गुन्हे आणि ऑनलाईन आर्थिक फसवणुकीसह सायबर गुन्ह्यांशी संबंधित प्रकरणांवर तज्ज्ञांनी नागरिकांना मोलाचा सल्ला दिला. तसेच महिला, बालके आणि ज्येष्ठ नागरिकांचे कायदेशीर अधिकार आणि आर्थिकदृष्ट्या दुर्बल घटकांसाठी शासकीय स्तरावर मिळणाऱ्या मोफत कायदेशीर मदतीची सविस्तर माहिती यावेळी देण्यात आली.या शिबिरास राजकीय आणि सामाजिक क्षेत्रातील अनेक प्रमुख मान्यवरांनी उपस्थित राहून आयोजकांच्या उपक्रमाचे कौतुक केले. कार्यक्रमास आमदार राजूमामा भोळे, पणन महासंघाचे अध्यक्ष रोहित निकम, माजी महापौर सदाशिव ढेकळे, माजी महापौर तथा नगरसेविका जयश्री सुनील महाजन, माजी स्थायी समिती सभापती तथा नगरसेवक राजेंद्र घुगे पाटील, माजी नगरसेवक प्रशांत नाईक, परीट समाजाचे प्रदेश उपाध्यक्ष सुरेश गोविंदा ठाकरे, ज्येष्ठ समाजसेवक उत्तमराव पांडुरंग नेरकर, ज्येष्ठ समाजसेवक नामदेव वसंत वंजारी, मेहरूण ज्येष्ठ नागरिक संघाचे दिलीप पुंडलिक लाडवंजारी, ज्येष्ठ पत्रकार दिलीप तिवारी यांची प्रमुख उपस्थिती होती.
न्याय विश्वास फाउंडेशनचे अध्यक्ष ॲड. अनिकेत निकम यांनी उपक्रमाची भूमिका मांडताना सांगितले की, सर्वसामान्यांना कायद्याची योग्य माहिती मिळून त्यांचा न्यायावर विश्वास अधिक दृढ व्हावा हाच या शिबिराचा मुख्य उद्देश आहे. नागरिकांनी आपल्या मूळ कागदपत्रांसह उपस्थित राहून शंकांचे निरसन करून घेतले. या यशस्वी आयोजनाबद्दल उपस्थितांनी न्याय विश्वास फाउंडेशनचे आभार मानले
