नवराज्य Live न्यूज नेटवर्क
जळगाव शहरातील रस्ते अधिक सुरक्षित, सुशोभित आणि आधुनिक करण्याच्या उद्देशाने आमदार मा. श्री. सुरेश दामु भोळे (राजूमामा) यांनी गेल्या दोन वर्षांपासून सातत्याने केलेल्या पाठपुराव्याला यश आले आहे. अपारंपारिक ऊर्जा विकास लेखाशीर्षांतर्गत जिल्हा नियोजन समिती, जळगाव यांच्या सन २०२६-२७ च्या आर्थिक वर्षातील नियोजनातून जळगाव शहरातील अजिंठा चौफुली ते विमानतळाकडे जाणाऱ्या प्रमुख मार्गावर आधुनिक एलईडी पथदिव्यांच्या उभारणीसाठी ५ कोटी रुपयांच्या निधीस मंजुरी देण्यात आली आहे.
या निधीमुळे अजिंठा चौफुली ते विमानतळ मार्गावर अत्याधुनिक एलईडी पथदिव्यांची उभारणी करण्यात येणार आहे. त्यामुळे या मार्गावरील प्रकाश व्यवस्था अधिक सक्षम होऊन वाहनचालक, पादचारी, नागरिक तसेच विमानतळाकडे जाणाऱ्या प्रवाशांच्या सुरक्षिततेत मोठी भर पडणार आहे. याशिवाय शहराच्या सौंदर्यातही लक्षणीय वाढ होणार असून हा मार्ग अधिक आकर्षक आणि सुरक्षित बनेल.
या महत्त्वपूर्ण कामासाठी आमदार सुरेश दामु भोळे (राजूमामा) यांनी मागील दोन वर्षांपासून सातत्याने पाठपुरावा केला. या प्रस्तावास जळगाव जिल्ह्याचे पालकमंत्री गुलाबराव पाटील . मंत्री गिरीश महाजन यांचे विशेष सहकार्य लाभले. त्यांच्या सहकार्यामुळे निधी मंजुरीची प्रक्रिया गतीने पूर्ण होऊ शकली.
यावेळी आमदार राजूमामा यांनी या विकासकामासाठी सहकार्य केल्याबद्दल महाराष्ट्राचे मा. मुख्यमंत्री श्री. देवेंद्रजी फडणवीस, मा. उपमुख्यमंत्री श्री. एकनाथजी शिंदे, मा. उपमुख्यमंत्री श्रीमती सुनेत्राताई पवार, मा. मंत्री श्री. गिरीशभाऊ महाजन, मंत्री संजय सावकारे तसेच जळगाव जिल्ह्याचे पालकमंत्री पाटील यांचे आभार व्यक्त केले.
याबाबत आमदार सुरेश दामु भोळे म्हणाले, “जळगाव शहराच्या सर्वांगीण विकासासाठी आवश्यक असलेल्या विविध पायाभूत सुविधांच्या कामांसाठी माझा सातत्याने पाठपुरावा सुरू आहे. आगामी काळातही शहरासाठी अधिकाधिक निधी उपलब्ध करून देण्यासाठी प्रयत्न सुरू राहतील. नागरिकांना दर्जेदार आणि आधुनिक मूलभूत सुविधा उपलब्ध करून देणे हेच माझे प्रमुख उद्दिष्ट आहे.”
– आमदार सुरेश दामु भोळे (राजूमामा)
