नवराज्यLive न्यूज नेटवर्क
जळगाव | प्रतिनिधी : जळगावात उघडकीस आलेल्या एमडी ड्रग्ज प्रकरणातील मुख्य संशयित भैय्या सोनवणे याच्या शोधासाठी स्थानिक गुन्हे शाखेने तीन विशेष पथके रवाना केली आहेत. अटक करण्यात आलेल्या दोन्ही आरोपींची सध्या पोलीस कोठडीत कसून चौकशी सुरू असून, या प्रकरणामागील संपूर्ण ड्रग्ज रॅकेट उघड करण्याच्या दृष्टीने तपासाला वेग आला आहे.
काही दिवसांपूर्वी शिवतीर्थ मैदान प्रवेशद्वाराजवळ, शासकीय तांत्रिक विद्यालय परिसरात स्थानिक गुन्हे शाखा आणि जिल्हापेठ पोलिसांनी संयुक्त कारवाई करत जयेश देविदास तायडे (२७, हरीओम नगर) आणि हितेंद्र शिवाजी परदेशी (३१, कांचन नगर) या दोघांना अटक केली होती. त्यांच्या ताब्यातून ५६.२९ ग्रॅम एमडी ड्रग्ज तसेच एक दुचाकी जप्त करण्यात आली होती.
चौकशीदरम्यान अटक आरोपींनी हा अंमली पदार्थ भैय्या सोनवणे याच्याकडून मिळाल्याची कबुली दिली आहे. त्यानंतर पोलिसांनी फरार आरोपीच्या शोधासाठी तीन स्वतंत्र पथके विविध ठिकाणी रवाना केली असून, त्याच्या हालचालींचा माग काढण्याचे काम सुरू आहे.
दरम्यान, न्यायालयाने अटक करण्यात आलेल्या दोन्ही आरोपींना सात दिवसांची पोलीस कोठडी सुनावली आहे. या काळात ड्रग्जचा पुरवठा, आर्थिक व्यवहार, तसेच या रॅकेटमध्ये आणखी कोणाचा सहभाग आहे, याचा तपास पोलीस करत आहेत.
या कारवाईमुळे जळगावातील ड्रग्ज तस्करीविरोधातील पोलिसांची मोहीम अधिक तीव्र झाली असून, फरार आरोपीला लवकरच अटक होईल, असा विश्वास तपास यंत्रणेकडून व्यक्त केला जात आहे.
