नवराज्य Live न्यूज नेटवर्क
पाळधी: इम्पिरियल इंटरनॅशनल स्कूल, पाळधी येथे १ जुलै रोजी राष्ट्रीय डॉक्टर दिन उत्साहपूर्ण वातावरणात साजरा करण्यात आला. समाजातील डॉक्टरांचे अनमोल योगदान अधोरेखित करणे आणि त्यांच्या निःस्वार्थ सेवेसाठी कृतज्ञता व्यक्त करणे हा या कार्यक्रमाचा मुख्य उद्देश होता.
कार्यक्रमाची सुरुवात दीपप्रज्वलन आणि प्रास्ताविकाने झाली. यावेळी विद्यार्थ्यांनी राष्ट्रीय डॉक्टर दिनाचे महत्त्व, डॉक्टरांची निःस्वार्थ सेवा तसेच आरोग्य क्षेत्रातील त्यांच्या योगदानावर प्रभावी भाषणे सादर करून उपस्थितांची मने जिंकली.
यावेळी शाळेचे चेअरमन इंजी. श्री. नरेश चौधरी यांनी विद्यार्थ्यांना मार्गदर्शन करताना डॉक्टर हे समाजाचे खरे जीवनरक्षक असून त्यांच्या अथक परिश्रमामुळे लाखो नागरिकांना नवजीवन मिळते, असे सांगितले. प्रत्येकाने डॉक्टरांचा सन्मान राखून त्यांच्या सेवेसाठी सदैव कृतज्ञ राहावे, असा संदेश त्यांनी दिला.
कार्यक्रमाला शहरातील मान्यवर डॉ. योगेश पाटील, डॉ. धनंजय जाधव, डॉ. सुधीर पाटील, डॉ. प्रमोद पाटील आणि डॉ. सुयोग पाटील यांची प्रमुख उपस्थिती लाभली. शाळेचे प्राचार्य आर. एल. माळी यांनी विद्यार्थ्यांना आरोग्य, सेवा आणि सामाजिक जबाबदारी याविषयी अनमोल मार्गदर्शन केले.
या कार्यक्रमाच्या निमित्ताने मान्यवरांच्या हस्ते शाळेच्या परिसरात वृक्षारोपण करण्यात आले. तसेच शैक्षणिक वर्ष २०२५–२६ मध्ये आपल्या वर्गात प्रथम क्रमांक मिळविणाऱ्या गुणवंत विद्यार्थ्यांचा सत्कारही मान्यवरांच्या हस्ते करण्यात आला.
यावेळी संचालक गजानन पाटील, प्राचार्या शारदा पाटील आणि मनीषा पाटील यांच्यासह शिक्षक, विद्यार्थी आणि पालक मोठ्या संख्येने उपस्थित होते.
कार्यक्रमाच्या शेवटी विद्यार्थ्यांनी डॉक्टरांप्रती आदर व्यक्त करत त्यांच्या उत्तम आरोग्य, दीर्घायुष्य आणि निरंतर सेवाकार्यासाठी शुभेच्छा दिल्या. या उपक्रमामुळे विद्यार्थ्यांमध्ये डॉक्टरांविषयी आदर, कृतज्ञता आणि समाजसेवेची भावना अधिक दृढ झाल्याचे दिसून आले.
