नवराज्य Live न्यूज नेटवर्क
जळगाव : स्थानिक गुन्हे शाखेने सराईत गुन्हेगारांविरोधात मोठी कारवाई करत हद्दपार करण्यात आलेल्या आरोपीला गावठी पिस्तुलासह अटक केली आहे. आरोपीकडून अंदाजे ३५ हजार रुपये किमतीचे विनापरवाना गावठी पिस्तूल जप्त करण्यात आले.पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी नितीन गांगुर्डे यांच्या मार्गदर्शनाखाली ही कारवाई करण्यात आली. स्थानिक गुन्हे शाखेचे पोलीस निरीक्षक राहुल गायकवाड यांना मिळालेल्या गोपनीय माहितीच्या आधारे पोलिसांनी शिवाजीनगर परिसरातील गेंडालाल मिलजवळ सापळा रचून आरोपी विजय उर्फ भोपमाळी याला ताब्यात घेतले.
झडतीदरम्यान आरोपीकडून एक गावठी पिस्तूल जप्त करण्यात आले. या प्रकरणी जळगाव शहर पोलीस ठाण्यात भारतीय न्याय संहिता व शस्त्र कायद्यानुसार गुन्हा दाखल करण्यात आला असून पुढील तपास सुरू आहे.
पोलिसांनी दिलेल्या माहितीनुसार, आरोपी विजय उर्फ भोपमाळी याच्याविरोधात जळगाव शहर व एमआयडीसी पोलीस ठाण्यात खूनाचा प्रयत्न, दरोड्याचा प्रयत्न, सरकारी कामात अडथळा, मारहाण, दंगल आणि शस्त्र कायद्याचे गंभीर स्वरूपाचे एकूण ८ गुन्हे दाखल आहेत.
ही कारवाई पोलीस निरीक्षक राहुल गायकवाड यांच्या नेतृत्वाखाली सहाय्यक फौजदार अतुल बंजारी, पोहेकॉ. विजय पाटील, किशोर पाटील, मुस्तफेज धनगर, प्रवीण भालेराव, छगन तावडे, रविंद्र कापडणे, गहिनीनाथ राठोड आदींच्या पथकाने केली.
