नवराज्य Live न्यूज नेटवर्क
जळगाव : अकोला एसीबीच्या भ्रष्टाचार कारवाईनंतर सीलबंद करण्यात आलेल्या सह जिल्हा निबंधक किरण चौधरी यांच्या जळगावातील घरात संशयास्पदरीत्या प्रवेश करण्याचा प्रयत्न उघडकीस आला आहे. घराचे कुलूप तोडून मागील बाजूने शिडीच्या सहाय्याने आत शिरणाऱ्या दोन संशयितांना पोलिसांनी रंगेहाथ पकडल्याने खळबळ उडाली असून, पुरावे नष्ट करण्याचा प्रयत्न होता का? याचा तपास आता वेगाने सुरू झाला आहे.
अकोला एसीबीने काही दिवसांपूर्वी किरण चौधरी यांच्यावर भ्रष्टाचार प्रतिबंधक कायद्यान्वये कारवाई केली होती. त्यानंतर जळगावातील गणेश कॉलनी परिसरातील साईप्रभा आर्केडमधील त्यांच्या राहत्या घराची तपासणी सुरू असल्याने एसीबीच्या पथकाने सदर घर सीलबंद केले होते.
दरम्यान शनिवारी उशिरा रात्री घरातून संशयास्पद हालचाली आणि आवाज येत असल्याचे शेजाऱ्यांच्या लक्षात आले. त्यांनी तत्काळ याची माहिती एसीबी अधिकाऱ्यांना दिली. त्यानंतर पोलीस निरीक्षक स्मिता नवघरे यांच्या नेतृत्वाखाली पोलिसांचे पथक घटनास्थळी दाखल झाले.
पोलिसांनी पाहणी केली असता घराच्या मागील बाजूने शिडी लावून दोन व्यक्तींनी घरात प्रवेश केल्याचे स्पष्ट झाले. चॅनल गेटचे कुलूप तोडण्यात आल्याचेही समोर आले. पोलिसांनी दोघांनाही जागीच पकडून ताब्यात घेतले.
या प्रकरणी जिल्हापेठ पोलीस ठाण्यात गुन्हा क्रमांक २०७/२०२६ नोंद करण्यात आला असून भारतीय न्याय संहितेच्या विविध कलमांनुसार गुन्हा दाखल करण्यात आला आहे. एसीबीच्या जळगाव विभागाच्या पोलीस निरीक्षक स्मिता वसंत नवघरे यांनी फिर्याद दिली आहे.
अटक करण्यात आलेल्यांमध्ये प्रसाद वसंत नारखेडे (रा. डांभुर्णी, ता. यावल) आणि प्रवीण अशोक महाजन (रा. गणेश कॉलनी, जळगाव) यांचा समावेश आहे. प्राथमिक माहितीनुसार, हे दोघे किरण चौधरी यांचे नातेवाईक असल्याची माहिती समोर आली आहे.
दरम्यान, सीलबंद घरात प्रवेश करण्यामागे नेमका उद्देश काय होता, घरातील कागदपत्रे, रोकड किंवा तपासासाठी महत्त्वाचे पुरावे हटविण्याचा प्रयत्न करण्यात आला होता का, तसेच हा प्रकार कोणाच्या सांगण्यावरून करण्यात आला, याचा आता एसीबी आणि पोलिसांकडून संयुक्त तपास सुरू आहे. या तपासातून आणखी धक्कादायक माहिती समोर येण्याची शक्यता वर्तवली जात आहे.
