नवराज्य Live न्यूज नेटवर्क
जळगाव: राज्याचे ग्रामविकास व पंचायतराज मंत्री गिरीश महाजन यांचे कृत्रिम बुद्धिमत्ता (AI) तंत्रज्ञानाच्या माध्यमातून मॉर्फ करण्यात आलेले कथित बनावट फोटो सोशल मीडियावर प्रसारित करून बदनामी करण्याचा प्रयत्न झाल्याप्रकरणी जळगाव सायबर पोलीस ठाण्यात गुन्हा दाखल करण्यात आला आहे.
सायबर पोलीस स्टेशन, जळगाव येथे गुन्हा क्रमांक 17/2026 नोंदविण्यात आला असून भारतीय न्याय संहिता (BNS) कलम 356, 3(5) तसेच माहिती तंत्रज्ञान अधिनियमातील कलम 66(C) आणि 67 अंतर्गत कारवाई करण्यात आली आहे.
पोलिसांनी दिलेल्या माहितीनुसार, एका फेसबुक खात्यावरून मंत्री गिरीश महाजन यांचे AI तंत्रज्ञानाच्या सहाय्याने तयार केलेले अथवा मॉर्फ केलेले फोटो वापरून आक्षेपार्ह आणि बदनामीकारक मजकूर प्रसारित करण्यात आला होता.
याबाबत प्राप्त झालेल्या तक्रारीची गंभीर दखल घेत सायबर पोलिसांनी तत्काळ गुन्हा दाखल केला.
दरम्यान, गिरीश महाजन यांनीही माध्यमांशी बोलताना संबंधित फोटो मॉर्फ केलेले असल्याचा दावा केला आहे.
काही फोटो क्रॉप करून दिशाभूल करण्याचा प्रयत्न करण्यात आल्याचे सांगत त्यांनी या प्रकरणात कायदेशीर कारवाई सुरू असल्याचे स्पष्ट केले.
या प्रकरणाचा तपास पोलीस निरीक्षक सतीश गोरडे यांच्या मार्गदर्शनाखाली सुरू असून संबंधित सोशल मीडिया अकाउंटधारक आणि फोटो प्रसारित करणाऱ्या व्यक्तींचा शोध घेण्यात येत आहे. दोषी आढळणाऱ्यांवर कठोर कायदेशीर कारवाई करण्यात येणार असल्याचे पोलिसांनी सांगितले.
जळगाव सायबर पोलिसांनी नागरिकांना आवाहन केले आहे की, सोशल मीडियावरील अप्रमाणित, दिशाभूल करणाऱ्या अथवा संशयास्पद पोस्टवर विश्वास ठेवू नये.
तसेच अशा पोस्ट पुढे शेअर किंवा प्रसारित करणे टाळावे, अन्यथा संबंधित व्यक्तींनाही कायदेशीर कारवाईला सामोरे जावे लागू शकते. लागू शकते
