नवराज्य Live न्यूज नेटवर्क
जळगाव : शहरातील बांभोरी गिरणा पुलावर आज शुक्रवारी संध्याकाळी ५. ०० वाजता, रोड रोलरचे इंधन अचानक संपल्याने मोठी वाहतूक कोंडी निर्माण झाली. पुलाच्या मध्यभागी रोड रोलर बंद पडल्यामुळे दोन्ही बाजूंनी वाहनांच्या लांबच लांब रांगा लागल्या होत्या.
विशेष म्हणजे पुलावर अनेक अवजड वाहने अडकून पडल्याने वाहनचालकांमध्ये काही काळ भीतीचे वातावरण निर्माण झाले. पुलावर मोठ्या प्रमाणात वाहतूक खोळंबल्यामुळे नागरिकांना मनस्ताप सहन करावा लागला.
वाहनांच्या वाढत्या रांगा आणि पुलावर थांबलेल्या अवजड वाहनांमुळे अनेकांची धडधड वाढली होती. काही वेळानंतर संबंधित यंत्रणेकडून रोड रोलरमध्ये इंधन भरल्यानंतर वाहतूक सुरळीत करण्यात आली.
या प्रकारामुळे पुलावरील कामांदरम्यान योग्य नियोजनाचा अभाव असल्याची चर्चा नागरिकांमध्ये सुरू होती.
