नवराज्य Live न्यूज नेटवर्क
जळगाव : नवापूर परिसरातील पोल्ट्री उद्योगांमध्ये बर्ड फ्ल्यू (एव्हियन इन्फ्लूएंझा) संसर्गाचा वाढता धोका लक्षात घेता जळगाव महानगरपालिकेचे उपमहापौर मनोज सुरेश चौधरी यांनी आरोग्य विभागाची तातडीची आढावा बैठक घेतली. शहरात कोणत्याही परिस्थितीत बर्ड फ्ल्यूचा प्रादुर्भाव होऊ नये, यासाठी युद्धपातळीवर प्रतिबंधात्मक उपाययोजना राबविण्याचे आदेश यावेळी देण्यात आले.
बैठकीत शहरातील चिकन मार्केट, पोल्ट्री फार्म, मांस विक्री केंद्रांची विशेष तपासणी मोहीम राबविणे, संशयित किंवा मृत पक्ष्यांचे नमुने तपासणीसाठी प्रयोगशाळेत पाठविणे तसेच बाधित भागातून येणाऱ्या पोल्ट्री वाहनांवर विशेष लक्ष ठेवण्याच्या सूचना देण्यात आल्या.
याशिवाय चिकन मार्केट, कत्तलखाने व पोल्ट्री परिसरात नियमित सॅनिटायझेशन व निर्जंतुकीकरण मोहीम राबविणे, अस्वच्छता आढळल्यास तत्काळ कारवाई करणे आणि संशयित परिस्थितीत त्वरित तपासणी करणारी विशेष पथके तयार करण्याबाबतही निर्णय घेण्यात आला.
नागरिकांमध्ये अफवा पसरू नयेत यासाठी जनजागृती मोहीम राबविणे, पूर्ण शिजवलेले अन्न सेवन करण्याचे आवाहन करणे तसेच बाजार परिसरात सूचना फलक व माहितीपत्रके लावण्याचे निर्देश देण्यात आले.
सार्वजनिक ठिकाणी मृत पक्षी आढळल्यास त्यांची तातडीने वैज्ञानिक पद्धतीने विल्हेवाट लावावी, तसेच संबंधित अधिकाऱ्यांनी २४ तास सतर्क राहावे, असे आदेश बैठकीत देण्यात आले. रुग्णालयांना देखील ताप, श्वसन त्रास किंवा संसर्गासारखी लक्षणे आढळणाऱ्या रुग्णांची तत्काळ तपासणी करण्याच्या सूचना देण्यात आल्या.
यावेळी उपमहापौर मनोज चौधरी म्हणाले की, “जळगावकरांच्या आरोग्याशी कोणतीही तडजोड केली जाणार नाही. प्रशासनाने सर्व प्रतिबंधात्मक उपाययोजना काटेकोरपणे राबवाव्यात. हलगर्जीपणा करणाऱ्यांवर कठोर कारवाई करण्यात येईल.”
दरम्यान, सर्व संबंधित विभागांनी समन्वय राखून दररोजचा आढावा अहवाल सादर करावा, अशा सूचनाही बैठकीत देण्यात आल्या.
