नवराज्य Live न्यूज नेटवर्क
जळगाव : शहरातील कानळदा रोड परिसरात कौटुंबिक वादातून एका महिलेने पतीचा गळा आवळून खून केल्याची धक्कादायक घटना उघडकीस आली आहे. दारूच्या नशेत वारंवार त्रास देणाऱ्या पतीला संतापाच्या भरात पत्नीने संपविल्याची कबुली पोलिस चौकशीत समोर आली. या प्रकरणामुळे केसी पार्क परिसरात खळबळ उडाली आहे.
मृत व्यक्तीचे नाव भरत नामदेव पाटील (वय ५८) असे असून ते पत्नी आणि दोन मुलांसह केसी पार्क भागात वास्तव्यास होते. पत्नी मनिषा पाटील या खासगी कापड दुकानात काम करत होत्या, तर दोन्ही मुले एमआयडीसी परिसरातील कंपनीत नोकरीला आहेत. भरत पाटील यांना दारूचे व्यसन असल्याने घरातील वातावरण नेहमी तणावपूर्ण असायचे, अशी माहिती परिसरातून समोर आली आहे.
मंगळवारी रात्री मनिषा पाटील या कामावरून घरी परतल्यानंतर भरत पाटील दारूच्या नशेत असल्याने दोघांमध्ये जोरदार वाद झाला. वाद विकोपाला गेल्यानंतर संतापाच्या भरात मनिषा पाटील यांनी दोरीच्या सहाय्याने पतीचा गळा आवळल्याचे पोलिस तपासात निष्पन्न झाले आहे. गळा आवळल्यानंतर भरत पाटील हे खाली कोसळल्याने त्यांच्या डोक्याला गंभीर दुखापत झाली.
घटनेनंतर परिसरातील नागरिकांच्या मदतीने भरत पाटील यांना जिल्हा रुग्णालयात दाखल करण्यात आले. मात्र डॉक्टरांनी तपासणीदरम्यान त्यांच्या मानेवर संशयास्पद खुणा आढळल्याने पोलिसांना माहिती देण्यात आली. त्यानंतर शवविच्छेदन अहवालात गळा आवळल्याने श्वास गुदमरून मृत्यू झाल्याचे स्पष्ट झाले.
प्राथमिक नोंद अकस्मात मृत्यूची करण्यात आली होती. मात्र वैद्यकीय अहवाल आणि चौकशीनंतर शहर पोलीस ठाण्यात खुनाचा गुन्हा दाखल करण्यात आला. पोलिसांनी संशयित पत्नी मनिषा पाटील यांना ताब्यात घेऊन चौकशी केली असता त्यांनी गुन्ह्याची कबुली दिल्याची माहिती सूत्रांनी दिली.
या घटनेचा पुढील तपास शहर पोलीस करत आहेत.
