नवराज्य Live न्यूज नेटवर्क
जळगाव (प्रतिनिधी) – शहरातील मनपा मालकीच्या खुल्या भूखंडावर अनधिकृत हस्तक्षेप झाल्याचा आरोप समोर आला असून, या प्रकरणी इंडियन रेड क्रॉस सोसायटीविरोधात तक्रार दाखल करण्यात आली आहे. सामाजिक कार्यकर्ते ॲड. पियुष नरेंद्र पाटील यांनी महापौर, उपमहापौर, सभापती, आयुक्त आणि उपायुक्त यांच्याकडे लेखी निवेदन देत कारवाईची मागणी केली आहे.
तक्रारीनुसार, शासकीय वैद्यकीय महाविद्यालय आणि इंडियन रेड क्रॉस सोसायटीच्या शेजारी मनपाचा एक मोठा आरक्षित खुला भूखंड आहे. महाविद्यालयाच्या बांधकामादरम्यान संबंधित जागेत मलबा टाकण्यासाठी काही प्रमाणात कंपाउंड भिंत तोडण्यात आली होती. मात्र बांधकाम पूर्ण होत आले तरी भिंत पुन्हा उभारण्यात आलेली नव्हती.
या परिस्थितीचा फायदा घेत इंडियन रेड क्रॉस सोसायटीकडून रात्रीतून सुमारे 15 ते 20 फूट कंपाउंड भिंत पाडून जेसीबीच्या सहाय्याने जागेचे सपाटीकरण करण्यात आल्याचा आरोप करण्यात आला आहे. त्यानंतर या ठिकाणी संस्थेची वाहने पार्किंगसाठी ठेवण्यात आल्याचेही नमूद करण्यात आले आहे.
यापूर्वी देखील संबंधित जागेवर संस्थेचे गेट उभारण्याचा प्रयत्न झाल्याचा आरोप असून, सामाजिक कार्यकर्त्यांच्या आक्षेपामुळे तो प्रयत्न थांबवण्यात आल्याचे तक्रारीत म्हटले आहे.
ॲड. पाटील यांनी प्रश्न उपस्थित करत म्हटले आहे की, कोट्यवधींच्या ठेवी असलेल्या मोठ्या संस्थेला मनपा मालकीच्या जागेची गरज का भासावी? तसेच या प्रकरणाचा सखोल तपास करून दोषींवर कारवाई करावी, अशी मागणी त्यांनी केली आहे.
दरम्यान, या प्रकरणामुळे शहरात चर्चा रंगली असून, मनपा प्रशासन काय भूमिका घेते याकडे सर्वांचे लक्ष लागले आहे.
