जळगाव, दि. ८ : सकल ब्राह्मण समाजाच्या एकजुटीचे प्रतीक ठरणाऱ्या भगवान श्री परशुराम जन्मोत्सवाच्या २०२६ च्या भव्य आयोजनाची तयारी अंतिम टप्प्यात पोहोचली आहे. बहुभाषिक ब्राह्मण संघाच्या वतीने यंदा सलग १७ व्या वर्षी हा जन्मोत्सव मोठ्या उत्साहात आणि विविध उपक्रमांसह साजरा केला जाणार आहे.
समाज एकत्र आणण्याच्या उद्देशाने सुरू झालेल्या या उपक्रमाला वर्षागणिक व्यापक प्रतिसाद मिळत असून, जळगावातून सुरू झालेली ही चळवळ आता संपूर्ण महाराष्ट्रभर विस्तारली आहे. शाखा, भाषा आणि भेद बाजूला ठेवून वर्षातून एकदा एकाच ठिकाणी एकत्र येण्याचा संदेश या जन्मोत्सवातून दिला जातो.
यंदाच्या आयोजनासाठी ४०० हून अधिक स्वयंसेवक श्रमदान करत असून, दानशूर व्यक्तींच्या आर्थिक सहकार्यामुळे कार्यक्रमाची व्याप्ती अधिक वाढली आहे. जन्मोत्सवाची सुरुवात ५ एप्रिल रोजी रक्तदान शिबिराने झाली.
वातावरण निर्मितीसाठी रविवार, दि. १२ एप्रिल रोजी सायंकाळी ५ वाजता महाबळ चौकातून विराट मोटारसायकल रॅली काढण्यात येणार आहे. ही रॅली काव्यरत्नावली चौक, रिंगरोड, शास्त्री टॉवर, सुभाष चौक, पांडे डेअरी चौक, वीर सावरकर पुतळा मार्गे पोलिस मल्टीपरपज हॉल येथे समाप्त होईल. त्यानंतर सायंकाळी ७ वाजता दानदाते व श्रमदाते गौरव सोहळा आयोजित करण्यात आला आहे.
मुख्य कार्यक्रम रविवार, दि. १९ एप्रिल रोजी पार पडणार आहे. सकाळी ९ वाजता ग्रामदैवत श्री राम मंदिर येथे परशुराम पूजन होईल. दुपारी ४.३० वाजता सुभाष चौकातून भव्य शोभायात्रेला प्रारंभ होणार आहे. या शोभायात्रेत आकर्षक भगवान परशुराम रथ, ढोल-ताशा, लेझीम, दांडिया पथके तसेच महिलांचे तलवारबाजी आणि दांडपट्टा प्रात्यक्षिके हे विशेष आकर्षण ठरणार आहेत. हजारोंच्या संख्येने सहभागी होणाऱ्या या शोभायात्रेचे समापन शिवतीर्थावर होणार आहे.
दरवर्षी नावीन्यपूर्ण उपक्रम राबवणाऱ्या संघटनेने यंदा निमंत्रण पत्रिकेऐवजी २८ पानी मराठी नववर्ष दिनदर्शिका प्रकाशित केली आहे. शास्त्रशुद्ध तिथींसह विविध ब्राह्मण कुळांची माहिती आणि समाजोपयोगी माहितीचा समावेश असलेली ही दिनदर्शिका प्रत्येक कुटुंबापर्यंत पोहोचवली जात आहे.
“स्वतः परशुराम दूत बना आणि हजारोंच्या संख्येने शोभायात्रेत सहभागी व्हा,” असे आवाहन अध्यक्ष अॅड. ओम त्रिवेदी यांनी केले. ते गोलानी मार्केट दक्षिणमुखी हनुमान मंदिर येथे आयोजित पत्र परिषदेत ते बोलत होते. यावेळी श्रीकांत खटोड, आर्किटेक नितीन पारगावकर आधी उपस्थित होते.तसेच वर्षभर विविध व्याख्याने व स्नेहसंमेलनांचे आयोजन छत्रपती संभाजी महाराज नाट्यगृह आणि गंधे सभागृह येथे करण्यात येणार असल्याची माहिती त्यांनी दिली.
या आयोजनासाठी पदाधिकारी, सभासद व कार्यकर्त्यांमध्ये उत्साहाचे वातावरण असून, सर्वजण जोमाने तयारीला लागले आहेत.
