जळगाव – (योगेश सुने चीफ एडिटर नवराज्य Live )
जळगाव शहर महानगरपालिकेची अडीच वर्षांनंतर पार पडलेली पहिली महासभा विविध चर्चांमुळे गाजली. या महासभेत नगरसेवक तथा स्थायी समिती सदस्य विशाल भोळे यांनी सभागृहात महत्त्वपूर्ण मुद्दे उपस्थित करत आगामी महासभांच्या कामकाजाबाबत सूचना मांडल्या.
महापौर दीपमाला काळे यांच्या अध्यक्षतेखाली झालेल्या या सभेत भोळे यांनी सांगितले की, पुढील महासभांमध्ये संवेदनशील व गंभीर विषयांसाठी किमान २० मिनिटांचा स्वतंत्र वेळ दिला पाहिजे. अन्यथा शहर विकासाशी संबंधित अनेक महत्त्वाचे मुद्दे दुर्लक्षित राहण्याची शक्यता आहे.
तसेच, प्रत्येक प्रभागातील नगरसेवकांना आपले प्रश्न मांडण्यासाठी किमान १० ते १५ मिनिटांचा वेळ देण्यात यावा, अशी मागणी त्यांनी केली. सर्व नगरसेवकांना समान संधी मिळाल्यास स्थानिक समस्यांवर प्रभावी चर्चा होऊ शकते, असे त्यांनी नमूद केले.
यासोबतच, संबंधित विषयांवर चर्चा होत असताना त्या-त्या विभागाचे अधिकारी उपस्थित राहणे अत्यावश्यक असल्याचेही त्यांनी स्पष्ट केले. विशेषतः विद्युत, अतिक्रमण, पाणीपुरवठा यांसारख्या महत्त्वाच्या विभागांचे अधिकारी व त्यांची संपूर्ण टीम सभागृहात उपस्थित असावी, जेणेकरून प्रश्नांना तत्काळ उत्तरे मिळू शकतील.
शेवटी, या सर्व सूचनांची अंमलबजावणी पुढील महासभेत करण्यात यावी, अशी विनंती विशाल भोळे यांनी अध्यक्षांकडे केली. त्यांच्या या मांडणीला सभागृहातील सदस्यांकडून टाळ्यांचा उत्स्फूर्त प्रतिसाद मिळाला.
