जळगावमध्ये ‘खान्देश महोत्सव २०२६’चे आयोजन; स्थानिक महिला उद्योजकांना मिळणार व्यासपीठ
नवराज्य Live न्यूज नेटवर्क
जळगाव : स्थानिक महिला बचत गट, स्वयंसहाय्यता गट व लघुउद्योजकांना प्रोत्साहन देण्याच्या उद्देशाने जळगाव शहर महानगरपालिका आणि महिला व बालकल्याण विभाग यांच्या संयुक्त विद्यमाने ‘खान्देश महोत्सव २०२६’ आयोजित करण्यात आला आहे. ‘व्होकल फॉर लोकल’ या संकल्पनेवर आधारित हा महोत्सव २६ फेब्रुवारी ते २ मार्च २०२६ या कालावधीत जळगावातील सागर पार्क परिसरात रंगणार आहे.
हा महोत्सव यंदा सहाव्या वर्षात पदार्पण करत असून, याबाबतची माहिती दीपमाला काळे यांनी दिली.
त्या महानगरपालिकेतील१७ व्या मजल्यावर महापौर कक्ष येथे आयोजित पत्र परिषदेत त्या बोलत होत्या यावेळी उपमहापौर मनोज चौधरी, शहर अभियान व्यवस्थापक गायत्री पाटील , आदी उपस्थित होते.
१८० स्टॉल्समधून खान्देशी संस्कृतीचे दर्शन
महोत्सवात एकूण १८० स्टॉल्स उभारण्यात येणार असून, त्यामध्ये महिला बचत गटांनी तयार केलेल्या हस्तकला वस्तू, गृहउपयोगी साहित्य, किचन व होम अप्लायन्सेस, इलेक्ट्रॉनिक दागिने, सौंदर्यप्रसाधने, ऑफिस व घरगुती सजावटीच्या वस्तू उपलब्ध असतील. तसेच खान्देशी पारंपरिक शाकाहारी व मांसाहारी खाद्यपदार्थांची खास मेजवानी नागरिकांना अनुभवता येणार आहे.
मनोरंजन, बक्षिसे आणि स्पर्धांचा रंग
खरेदीसोबतच नागरिकांच्या मनोरंजनासाठी सांस्कृतिक कार्यक्रमांची रेलचेल असणार आहे. २८ फेब्रुवारी रोजी प्रसिद्ध अभिनेता ओम यादव यांच्या उपस्थितीत महिलांसाठी विशेष कार्यक्रम आयोजित करण्यात येणार असून, त्यात पैठणी, राणीहार व आकर्षक भेटवस्तू जिंकण्याची संधी मिळणार आहे.
याशिवाय गायन, समूह नृत्य, स्थानिक कलाकारांचे सादरीकरण, लहान मुलांसाठी गेम झोन तसेच जादूगाराचे प्रयोग ठेवण्यात आले आहेत. उत्कृष्ट स्टॉल धारकांचा तसेच उपयुक्त वस्तूंच्या स्पर्धेतील विजेत्यांचा सन्मान करण्यात येणार आहे.
प्लास्टिकमुक्त महोत्सवाची संकल्पना
महोत्सव प्लास्टिकमुक्त ठेवण्यावर भर देण्यात आला असून, नागरिकांना कापडी पिशव्यांचे वाटप करण्यात येणार आहे, अशी माहिती मनोज चौधरी यांनी दिली.
नागरिकांना आवाहन
महापौर दीपमाला काळे यांनी जळगावकरांना कुटुंबासह महोत्सवाला भेट देण्याचे व स्थानिक महिला उद्योजकांच्या उत्पादनांना खरेदीद्वारे प्रोत्साहन देण्याचे आवाहन केले आहे.
