मातृभाषेचा पेपरने दहावीच्या परीक्षेला सुरुवात !
शहरात १५ केंद्रावर तिसरी नजर :
विद्यार्थ्यांची तपासणी नंतर देण्यात आला प्रवेश
नवराज्य Live न्यूज नेटवर्क
जळगाव | दहावीच्या बोर्ड परीक्षांना आज अधिकृत सुरुवात झाली असून पहिल्या दिवशी सकाळी ११ ते दुपारी २ या वेळेत मातृभाषा मराठीचा पेपर घेण्यात आला. शहरासह संपूर्ण जिल्ह्यात परीक्षा शांततेत पार पडली असून कोणताही अनुचित प्रकार घडू नये यासाठी प्रशासन सतर्क होते.
शहरातील १५ परीक्षा केंद्रांवर सीसीटीव्ही कॅमेऱ्यांद्वारे सतत देखरेख ठेवण्यात आली. ज्या केंद्रांवर सीसीटीव्ही सुविधा उपलब्ध नाही, त्या ठिकाणी मोबाइल अॅप व झूम प्रणालीच्या माध्यमातून थेट निरीक्षण करण्यात आले. परीक्षा केंद्रात प्रवेश देण्यापूर्वी प्रत्येक विद्यार्थ्याची कसून तपासणी करण्यात आली.
यंदा जळगाव जिल्ह्यातून एकूण ५९,४७८ विद्यार्थी दहावीची परीक्षा देत आहेत. यामध्ये ३३,६८० मुले व २५,६९० मुली सहभागी आहेत. तसेच २७३ दिव्यांग विद्यार्थ्यांना लेखनिक सुविधा उपलब्ध करून देण्यात आली आहे.
जिल्ह्यात एकूण १४७ परीक्षा केंद्रांवर परीक्षा होत असून गैरप्रकार रोखण्यासाठी ९ भरारी पथके सज्ज ठेवण्यात आली आहेत. कोणत्याही केंद्रावर सामूहिक कॉपी आढळल्यास संबंधित विद्यार्थ्यांसह शिक्षण संस्था चालकावरही थेट गुन्हा दाखल करण्यात येणार आहे.
पेपर संपल्यानंतर केंद्र परिसराची तपासणी करण्यात येणार असून गाईडची पाने, चिठ्ठ्या किंवा अनधिकृत साहित्य आढळल्यास संबंधित केंद्रप्रमुखावर कठोर कारवाई केली जाईल, अशी माहिती शिक्षण अधिकारी कल्पना चव्हाण यांनी दिली.
