शिवतीर्थावर मध्यरात्रीच्या महाआरतीला शिवभक्तांचा जनसागर उसळला!
छत्रपती शिवाजी महाराज जयंतीनिमित्त युवा पर्व फाउंडेशन व नगरसेवक सुनील खडके यांच्या वतीने भव्य आयोजन
नवराज्य Live न्यूज नेटवर्क
जळगाव – छत्रपती शिवाजी महाराज यांच्या ३९६ व्या जयंतीनिमित्त जळगाव शहरात शिवभक्तांचा अभूतपूर्व उत्साह पाहायला मिळाला. शिवजयंतीच्या आदल्या दिवशी मध्यरात्री बारा वाजता शिवतीर्थ मैदानावर आयोजित महाआरतीसाठी हजारो शिवभक्त रस्त्यावर उतरले होते. शिवभक्तांच्या “जय भवानी, जय शिवाजी”च्या गजराने संपूर्ण परिसर दुमदुमून गेला.
शिवजयंतीनिमित्त जळगाव शहरातील शिवतीर्थ मैदानावरील अश्वारूढ शिवरायांच्या पुतळ्याला दरवर्षीप्रमाणे यंदाही मध्यरात्री महाआरती करण्यात आली. या महाआरतीचे आयोजन माजी उपमहापौर व विद्यमान नगरसेवक सुनील खडके आणि युवा पर्व फाउंडेशन यांच्या वतीने करण्यात आले होते.
यावेळी जळगाव शहरातील छत्रपती शिवाजी महाराजांच्या पुतळ्याला पुष्पहार अर्पण करून शिवरायांना मानवंदना देण्यात आली. कार्यक्रमाला आमदार सुरेश भोळे, महापौर दीपमाला काळे, उपमहापौर मनोज चौधरी, नगरसेवक सुनील खडके यांच्यासह विविध लोकप्रतिनिधी, पदाधिकारी आणि हजारो शिवभक्त मोठ्या संख्येने उपस्थित होते.
यावेळी बोलताना माजी उपमहापौर सुनील खडके म्हणाले, “हा उपक्रम आम्ही गेल्या चार वर्षांपासून सातत्याने राबवत आहोत. यंदाचे पाचवे वर्ष असून शिवजयंतीच्या पूर्वसंध्येला मध्यरात्री महाआरतीसाठी लोकप्रतिनिधी व तमाम शिवभक्तांनी मोठ्या संख्येने उपस्थित राहावे, असे आवाहन केले होते. नागरिकांनी दिलेला उत्स्फूर्त प्रतिसाद पाहून आम्ही भारावून गेलो आहोत.”
मध्यरात्रीच्या या महाआरतीने शिवजयंती उत्सवाला भक्तिभावाचे व प्रेरणादायी स्वरूप प्राप्त झाले असून, शिवतीर्थ परिसर शिवमय झाला होता.
