नवराज्य live न्यूज नेटवर्क
जळगाव : येथील एमआयडीसी परिसरातील आर्याव्रत प्रायव्हेट लिमिटेड केमिकल कंपनीला शुक्रवारी सकाळच्या सुमारास आग लागली. ती एवढी भीषण होती, की दोन ते तीन किलोमीटरवरून लोट दिसत होते. आगीवर नियंत्रण मिळवण्यात आले असून जीवितहानी झालेली नाही.
आगीत जीवितहानी झाली नसली, तरी वित्त हानी मोठ्या प्रमाणात झाल्याची माहिती जिल्हाधिकारी रोहन घुगे यांनी पत्रकारांशी बोलताना दिली. जिल्हाधिकारी घुगे यांच्यासह आमदार सुरेश भोळे यांनी घटनास्थळी भेट देऊन आगीचे कारण तसेच झालेल्या आर्थिक नुकसानीची माहिती घेतली.
औद्योगिक वसाहतीत आर. एल. चौफुलीनजीकच्या एन सेक्टरमध्ये आर्यव्रत केमिकल कंपनीला सकाळी ११ च्या सुमारास आग लागली. कंपनीतील कामगारांनी प्रसांगवधान राखत आपले जीव वाचवले. आगीने रौद्ररूप धारण केले. महानगरपालिकेसह जैन इरिगेशन, वरणगाव, भुसावळ, जामनेर, नशिराबाद येथील नगर परिषदांचे अग्नीशमन बंब आग विझविण्यासाठी सरसावले. जवानांनी शर्थीचे प्रयत्न करत आगीवर काबू मिळवला त्यामुळे पुढील अनर्थ टळला. आगीत कंपनीतील तयार व कच्चा माल तसेच इतर साहित्य जळून खाक झाले. आगीचे नेमके कारण अद्याप स्पष्ट झाले नसून, शॉर्टसर्किट मुळे आग लागल्याची शक्यता व्यक्त केली जात आहे. एमआयडीसी पोलिसांनी घटनेचे गांभीर्य पाहता परिसरातील बंदोबस्त वाढवत अग्नीशमन दलाच्या जवानांना आग विझविण्यासाठी हातभार लावला.
