उदयनगर (ता. अमळनेर) -येथे समृद्ध पंचायत राज अभियान अंतर्गत आजी-माजी विद्यार्थ्यांचे स्नेहसंमेलन सोमवार, दिनांक 27 ऑक्टोबर 2025 रोजी उत्साहात पार पडले.या स्नेहसंमेलनात सर्व माजी विद्यार्थ्यांनी लोकसहभागातून आर्थिक, श्रमदान, कौशल्या धारित मार्गदर्शन, अशा विविध स्वरूपात शाळेला मदत करण्याचा ठराव एकमुखाने केला.
याप्रसंगी लोकनियुक्त सरपंच प्रकाश वाघ यांनी मनोगत व्यक्त करताना सांगितले की,
> “हीच ती शाळा जिथे आपण अक्षर ओळखली, शिस्त शिकलो आणि जीवनात लढत पुढे जाण्याची प्रेरणा मिळवली. या शाळेनेच आपल्याला जगण्याचे आणि आनंदाने जगवण्याचे बळ दिले.”
अशा या माय माऊलीच्या उपकारातून उतराई होण्याचा प्रयत्न करूया..
ज्या शाळेने आपल्यावर ‘ज्ञानाचे कर्ज’ केले, ते किमान काही अंशी तरी परत फेडण्याची ही संधी आहे,” असे त्यांनी आवाहन केले. त्यांच्या या आवाहनास माजी विद्यार्थ्यांनी उत्स्फूर्त प्रतिसाद देत सुमारे रु. 1 लाख 26 हजार रक्कम जमा केली.
या निधीतून जिल्हा परिषदेच्या मराठी शाळेसाठी लोकसहभागातून रंगमंच, किचन शेडसाठी नवीन पत्रे, एलईडी टीव्ही व आरओ खरेदी करण्यात येणार आहे.
सदर प्रसंगी शाळेचे माजी विद्यार्थी जे सध्या शिरपूर येथे माध्यमिक विद्यालयात मुख्याध्यापक आहेत असे आ. शांताराम सोनवणे सरांनी मनोगत व्यक्त करताना शाळेच्या जुन्या आठवणींना उजाळा देत सद्यस्थितीत शाळेला जास्तीत जास्त पुढे नेण्यासाठी करावयाच्या गोष्टींची सविस्तर अशी माहिती दिली व शाळेला भरभराटी मिळवून देण्याचा चंग बांधत ; त्यांच्या मित्रमंडळींना आवाहन केले. तसेच माजी विद्यार्थी राजकिरण पाटील यांनीही शाळेसाठी विविध स्तरावर मदत करण्याचे ठरवले.
कार्यक्रमास माजी सरपंच धुडकू अभिमान पाटील, विकास सोसायटी चेअरमन शांताराम पाटील, शाळा व्यवस्थापन समिती अध्यक्ष महेश पाटील, उपसरपंच राकेश पाटील, ग्रामपंचायत सदस्य विश्वास पाटील, राजेंद्र पाटील, सुदाम सोनवणे, ग्रामपंचायत अधिकारी सोनी पाटील, तसेच माजी विद्यार्थी किशोर वाघ, वासुदेव कापडणे, शांताराम सोनवणे सर, पोलीस पाटील खैरनार, मा. उपसरपंच सतीलाल पाटील, सुनील पाटील, कृष्णा पाटील, किरण पाटील, मुख्याध्यापक मासुळे सर व शिक्षक संजय पाटील शिंदे सर अंगणवाडी सेविका-मदतनीस, आशा वर्कर, सुभाष पाटील (रोजगार सेवक), सागर सोनवणे (ग्रामपंचायत शिपाई) तसेच माध्यमिक विद्यालयाचे विद्यार्थी उपस्थित होते. कार्यक्रमाचे प्रास्ताविक श्री नितीन शिंदे सरांनी केले व श्री संजय पाटील सरांनी मनोगत व्यक्त केले. कार्यक्रमाचे सूत्रसंचालन मुख्याध्यापक श्री मासुळे सरांनी केले.
स्नेहसंमेलनानंतर “स्वच्छतेचा वार – सोमवार” या उपक्रमांतर्गत स्वच्छता मोहीम राबवण्यात आली..
