जळगाव, – दि. १५ ऑक्टोबर दीपस्तंभ मनोबलतर्फे दिवाळीच्या मंगलप्रसंगी दरवर्षीप्रमाणे ‘प्रकाशपूजन’ कार्यक्रमाचे आयोजन करण्यात आले.
या कार्यक्रमास प्रमुख पाहुणे म्हणून मा. सतीश जी मराठे (स्वतंत्र संचालक, भारतीय रिझर्व्ह बँक व अध्यक्ष, नाबार्ड), मा. मीनल करणवाल (मुख्य कार्यकारी अधिकारी, जिल्हा परिषद, जळगाव), मा. अनिकेत व समीक्षा आमटे (सामाजिक कार्यकर्ते)उपस्थित होते.
संस्थेत निवासी शिक्षण घेणाऱ्या दिव्यांग, अनाथ, ट्रान्सजेन्डर तसेच आर्थिक दृष्ट्या वंचित विद्यार्थ्यांना या दिवशी ओवाळून ‘ज्ञानरूपी प्रकाशाचे पूजन’ करण्यात आले.
विद्यार्थ्यांनी सादर केलेल्या सांस्कृतिक कार्यक्रमांनी सर्व उपस्थितांची मने जिंकली.
कार्यक्रमात डॉ. राजेश डाबी व पुखराज पगारिया परिवार यांच्यातर्फे विद्यार्थ्यांना भेटवस्तू व स्नेहभोजन देखील दिले गेले. तसेच संस्थेचे सर्व संचालक शहरातील तसेच पुणे, मुंबई आणि नाशिक येथून आलेले देणगीदार उपस्थित होते.
या प्रसंगी दीपस्तंभ मनोबलच्या अ‍ॅक्सेसीबल बसचे लोकार्पण सतीश मराठे, मीनल करणवाल, अनिकेत आणि समीक्षा आमटे यांच्या हस्ते करण्यात आले. ही बस सुविधा दिव्यांग विद्यार्थ्यांच्या स्वावलंबनाकडे संस्थेने टाकलेले एक अर्थपूर्ण पाऊल ठरेल, असे मत मान्यवरांनी व्यक्त केले.
या वेळी मा. सतीश मराठे म्हणाले, “दीपस्तंभ मनोबलने शिक्षण, संस्कार आणि सामाजिक बांधिलकी यांचा सुंदर संगम घडवला आहे. संस्थेचे या कार्यातील सातत्य म्हणजे समाजातील सकारात्मक परिवर्तनाचे प्रतीक आहे.”अनिकेत आमटे यांनी विद्यार्थ्यांच्या कलागुणांचे कौतुक करत, “या मुलांच्या कलाकृतीतून आशा आणि आत्मविश्वासाचा खरा प्रकाश झळकतो,” असे मत व्यक्त केले. संस्थेचे संस्थापक यजुर्वेन्द्र महाजन यांनी या उपक्रमाचा हेतू सांगताना म्हटले, “प्रकाशपूजन हा केवळ सण नव्हे, तर अंधारातून प्रकाशाकडे, निराशेतून आशेकडे आणि एकाकीपणातून एकात्मतेकडे नेणारा सामाजिक संदेश आहे.”
या उपक्रमाद्वारे दीपस्तंभ मनोबलने पुन्हा एकदा आपल्या कार्यातून ‘समावेशक समाज’ घडवण्याची भूमिका अधोरेखित केली आहे.
