नवराज्य डिजिटल न्यूज नेटवर्क
जळगाव – ॲक्सॉन ब्रेन हॉस्पीटल येथे डॉ. निलेश किनगे आणि त्यांच्या टीमने मेंदूतील रक्तवाहिनीच्या गुंतागुंतीच्या यशस्वीरित्या शस्त्रक्रिया करून भुसावळ तालुक्यातील आचेगाव येथील गृहिणी अलका रवींद्र भोळे यांना जीवनदान दिले आहे.
अलका रवींद्र भोळे यांना गेल्या एका महिन्यापासून डाव्या डोळ्याची पापणी पडून दिसायला त्रास होत होता. त्यांनी अनेक डॉक्टरांचा सल्ला घेतला, परंतु त्यांच्या आजाराचे अचूक निदान होऊ शकले नाही. अखेरीस त्यांना ॲक्सॉन ब्रेन हॉस्पीटल येथे दाखल करण्यात आले. तपासणीदरम्यान, त्यांच्या डोक्यातील रक्तवाहिन्यांचा असामान्य फुगा फुटून रक्तस्त्राव झाल्याचे गंभीर निदान झाले.
डॉ. निलेश किनगे यांनी तत्काळ मेंदूची अँजिओग्राफी केली, ज्यामध्ये डोक्याच्या डाव्या धमनीत मोठा फुगा असल्याचे स्पष्ट झाले. या फुग्याची ‘मान’ मोठी असल्याने, डॉ. किनगे यांनी फ्लो डायव्हर्टर स्टेंट टाकण्याचा निर्णय घेतला. यासाठी त्यांनी सिल्क व्हिस्टा हा ब्लास्ट कंपनीचा मेड इन जर्मनी स्टेंट वापरून फुगा पूर्णपणे बंद केला. यासाठी त्यांना भूलतज्ञ डॉ. विनोद किनगे, रेडिओलॉजिस्ट डॉ. वैजयंती किनगे, न्यूरोसर्जन डॉ. संजीव हूजुरबाजार यांचे सहकार्य लाभले.
अशा प्रकारच्या गुंतागुंतीच्या मेंदूच्या शस्त्रक्रिया पूर्वी पुणे-मुंबईसारख्या महानगरांमध्येच शक्य होत्या. मात्र, गेल्या १० वर्षांपासून जळगावातील ॲक्सॉन ब्रेन हॉस्पीटलमध्ये अत्याधुनिक तंत्रज्ञानाचा वापर करून मेंदू संबंधित आजारांचे अचूक निदान आणि यशस्वी उपचार होत असल्याचे डॉक्टर किनगे यांनी सांगितले.
ॲक्सॉन ब्रेन हॉस्पीटल मेंदू संबंधित सर्व प्रकारच्या आजारांचे निदान व उपचारांसाठी एक विश्वसनीय रुग्णालय म्हणून ओळखले जात आहे.
