नवराज्य डिजिटल न्यूज नेटवर्क
(भडगाव बाळद ) – बाळद परिसरात रविवारी मध्य रात्रीपासून मुसळधार पावसाने हाहाकार माजवला आहे. विजांच्या कडकडाटासह सुरू असलेल्या या पावसामुळे नागरिकांमध्ये भीतीचे वातावरण निर्माण झाले आहे. पावसाचा जोर सतत वाढत असून जनजीवन विस्कळीत झाले आहे.
तितुर नदीच्या पाण्यात झपाट्याने वाढ होत असल्याने नदीकाठच्या नागरिकांना प्रशासनाने तातडीने सुरक्षित स्थळी जाण्याचे आवाहन केले आहे. तसेच गुरेढोरे नदीकाठावर बांधलेली असल्यास त्वरित सुरक्षित ठिकाणी हलविण्याच्या सूचना देण्यात आल्या आहेत. नागरिकांनी स्वतःची व आपल्या परिवाराची काळजी घ्यावी, असे आवाहन प्रशासन व स्थानिक प्रतिनिधींनी केले आहे.
दरम्यान, नुकतीच मिळालेल्या माहितीनुसार बाळद गावाला चौफेर पाण्याने वेढा दिला असून गावाशी संपर्क साधणे कठीण झाले आहे. सध्या गावात येण्यासाठी केवळ भडगाव मार्गच खुला असून पाचोरा व चाळीसगाव मार्ग पूर्णपणे बंद झाले आहेत. पाचोरा मार्गावरील झोडप नाल्याला महापूर आल्याने रस्ता वाहतुकीसाठी बंद झाला आहे. तर, चाळीसगाव मार्गावरील कसारा नाल्याला महापूर आल्याने तो रस्ता देखील बंद करण्यात आला आहे.
बाहेरगावाहून बाळद गावात येणाऱ्या नागरिकांनी पाचोरा व चाळीसगाव मार्ग टाळावा व केवळ भडगाव मार्गेच प्रवास करावा, असे आवाहन करण्यात आले आहे. मुसळधार पावसामुळे निर्माण झालेली परिस्थिती पाहता नागरिकांमध्ये भीतीचे वातावरण असून प्रशासनाकडून सतत लक्ष ठेवले जात आहे.
